شال نیوز
پېښور (شال نیوز) : د خېبر پښتونخوا د ځنډول شوي صوبايي حکومت وزیراعلی سهېل اپریدي، د صوبايي اسمبلۍ سپیکر بابر سلیم سواتي او د تحریک انصاف صوبايي صدر جنید اکبر په ګډون د ګوند اته مشران د پولیسو په حفاظتي حراست کي دي.
د پولیسو چارواکو د اکتوبر پر ۱۲مه تایید کړې چې دغه مشران په صوبه کي د ایمرجنسي او ګورنر راج له نافذېدو وروسته په حراست کي اخیستل شوي دي.
د پاکستان د کورنیو چارو وزیر مملکت طلال چوهدري رویټرز خبري اژانس ته ویلي چې سهېل اپریدي او د هغه د کابینې ځینې غړي د اکتوبر پر ۱۱مه په حفاظتي حراست کي اخیستل شوي دي.
نوموړي ویلي، که د نیول شوو کسانو پر ضد مقدمې موجودې وي، قانوني کارروایي به ورسره کېږي او نور کسان به خوشې کړل شي.
د پولیسو د چارواکو په وینا، د تحریک انصاف اته مشران په حراست کي دي، خو د ټولو کسانو نومونه نه دي څرګند شوي. پولیس وايي، دغه اقدام د موجوده امنیتي حالاتو او د سیاسي مشرانو د حفاظت لپاره شوی دی.
د پاکستان وفاقي حکومت د اکتوبر پر ۱۱مه په خېبر پښتونخوا کي ایمرجنسي او ګورنر راج نافذ کړ او د تحریک انصاف په مشرۍ صوبايي حکومت یې وځنډاوه.
وفاقي حکومت وايي، دا پرېکړه یې په صوبه کي د وسله والو بریدونو د زیاتېدو او د صوبايي حکومت له خوا د امنیتي ستونزو پر ضد د کافي اقداماتو د نه کولو له امله کړې ده.
خو تحریک انصاف دغه تورونه رد کړي او د ګورنر راج نافذول یې د ولسي رایو او جمهوري ادارو پر ضد اقدام بللی دی. د تحریک انصاف مشرانو ویلي چې د وفاقي حکومت پرېکړه به په عدالت کي چېلنج کوي.
د ګورنر راج له نافذېدو وروسته د صوبې انتظامي واکونه ګورنر فیصل کریم کنډي ته سپارل شوي او د حکومتي چارو د پرمخ وړلو لپاره یوولس کسیزه مشورتي ډله هم ټاکل شوې ده.
.jpeg)
په همدې وخت کي د تحریک انصاف د مشرانو نیولو او د صوبايي حکومت ځنډولو په خېبر پښتونخوا کي سیاسي اختلافات زیات کړي دي.
تر اوسه دا نه ده څرګنده چې سهېل اپریدي او نور مشران په کوم ځای کي ساتل کېږي، د هغوی پر ضد کومې مشخصې مقدمې شته او کله به خوشې کېږي.
د تحریک انصاف مشران د عمران خان د خوشې کولو او هغه ته د طبي اسانتیاوو د برابرولو غوښتنه کوي. د ګوند احتجاجي لاریون د ایمرجنسي له اعلان مخکې روان و.
.jpeg)
.jpeg)
.jpeg)
