شال نیوز
کابل (شال نیوز) : د افغانستان پخواني ولسمشر ،حامد کرزي، په کندهار، خوست او پکتیا کې د پاکستان تازه هوايي بریدونه غندلي او له اسلام اباده یې غوښتي چې د افغانستان په اړه خپله پالیسي بدله او له کابل سره د ښه ګاونډیتوب پر بنسټ اړیکې جوړې کړي.
کرزي د سپتمبر پر ۲۴مه ویلي، پاکستان لا هم د افغانستان پر وړاندې هغه څه ته دوام ورکوي چې ده «منفي پالیسي» بللې ده. د هغه په وینا، د دې پالیسۍ اغېزې اوس خپله پاکستان ته هم رسېدلې دي.
کرزي ویلي، افغانان د خپلو داخلي اختلافونو باوجود د هغه څه پر وړاندې یو دریځ لري چې ده د پاکستان «تېری» بللی دی. هغه د پاکستان له حکومت څخه غوښتي چې له افغانستان سره خپلې اړیکې د ښه ګاونډیتوب پر اصولو برابرې کړي.
.jpeg)
دا څرګندونې وروسته له هغې شوې چې پاکستان د سپتمبر پر ۲۴مه د افغانستان په کندهار، پکتیا او خوست ولایتونو کې هوايي بریدونه وکړل.
د طالبانو د حکومت ویاند ذبیح الله مجاهد وايي، په دغو بریدونو کې څلور ملکي کسان وژل شوي دي. هغه بریدونه «ښکاره تېری» بللی او ویلي یې دي چې په وړاندې به یې «مناسب ځواب» ورکړل شي. د څلورو کسانو د وژل کېدو شمېر تر اوسه په خپلواکه توګه نه دی تایید شوی.
پاکستان بیا وايي، بریدونه یې وروسته له هغې کړي چې د سپتمبر پر ۲۳مه اته بې پیلوټه الوتکې د افغانستان له خاورې د پاکستان هوايي حریم ته ننوتې.
د پاکستان د اطلاعاتو وزیر عطاالله تارړ ویلي، پاکستاني ځواکونو په افغانستان کې لس ځایونه په نښه کړي دي. د هغه په وینا، دغه ځایونه د بې پیلوټه الوتکو د ساتلو او پورته کولو لپاره کارېدل.
.jpeg)
.jpeg)
افغان چارواکو د بې پیلوټه الوتکو په اړه د پاکستان دعوه رد کړې ده. پاکستان تر اوسه داسې خپلواک شواهد نه دي وړاندې کړي چې وښيي دغه اته الوتکې د افغانستان له خاورې پورته شوې وې.
د خوست د والي ویاند مستغفر ګربز ویلي، د سهار شاوخوا درې نیمې بجې د دغه ولایت په څو سیمو، د ګربزو په ګډون، هوايي بریدونه شوي دي. د هغه په وینا، په دغو بریدونو کې مرګ ژوبله نه ده شوې.
په پکتیا کې هم ځايي چارواکو ویلي چې د طالبانو د پوځ د ۲۰۳ منصوري قول اردو مرکز په نښه شوی دی. په کندهار کې بیا د «ملا صاحب» په نوم پر یو پوځي مرکز د برید راپور ورکړل شوی دی.
دا تازه بریدونه درې ورځې وروسته له هغې شوي چې د سپتمبر پر ۲۱مه پاکستان په کونړ او پکتیکا کې هم هوايي بریدونه کړي وو. افغان چارواکو ویلي وو چې په هغو بریدونو کې درې ملکي کسان وژل شوي او څلور نور ژوبل شوي وو.
پاکستان بیا ویلي وو چې په هغو عملیاتو کې یې وسله وال په نښه کړي دي. د هوايي بریدونو او بې پیلوټه الوتکو په اړه د دواړو خواوو متضادو دعوو په وروستیو ورځو کې د کابل او اسلام اباد ترمنځ ترینګلتیا زیاته کړې ده.
پاکستان تور لګوي چې د پاکستان تحریک طالبان او نورې وسله والې ډلې د افغانستان له خاورې د پاکستان پر ضد فعالیت کوي، خو د طالبانو حکومت دا تور ردوي.
.jpeg)
