شال نیوز
تهران / اسلام اباد : د پاکستان د پوځ مشر فیلډ مارشل ،عاصم منیر، به سبا، د اګست په ۲۴مه، تهران ته سفر وکړي. ایران وايي، چې دا سفر په سیمه کې د سولې او امنیت د ټینګښت لپاره د پاکستان د روانو هڅو دوام دی.
د ایران د بهرنیو چارو وزارت ویاند اسماعیل بقايي ،د اګست په ۲۳مه، د سفر د اعلان پر مهال وویل، چې عاصم منیر به تهران ته ولاړ شي، خو د هغه د لیدنو بشپړ مهالوېش او د خبرو تفصیلي اجنډا لا نه ده اعلان شوې.
دا سفر په داسې وخت کې کېږي چې پاکستان د ایران او امریکا ترمنځ د جګړې د پای ته رسولو لپاره د منځګړیتوب رول لوبوي. اسلام اباد په وروستیو میاشتو کې ویلي وو چې له دواړو خواوو سره په تماس کې دی او د سیمه ییزو هېوادونو په همکارۍ د شخړې د سیاسي حل هڅې کوي.
د پاکستان د بهرنیو چارو وزارت د اګست په ۶مه هم ویلي وو چې اسلام اباد د ایران او امریکا ترمنځ د منځګړیتوب په بهیر کې ښکېل پاتې دی او د هرمز تنګي په ګډون د سیمه ییزو کړکېچونو د حل لپاره له نورو هېوادونو سره ګډې هڅې کوي.
د ایران حکومت د عاصم منیر سفر د «لوېدیځې اسیا د سولې، ثبات او امنیت» له روانو هڅو سره تړلی بولي. له دې کبله تمه کېږي چې د ایران ـ امریکا شخړه، د هرمز تنګي وضعیت، سیمه ییز امنیت او د ایران او پاکستان دوه اړخیزې اړیکې به د خبرو له مهمو موضوعاتو وي، خو ایراني او پاکستاني چارواکو تر اوسه دا اجنډا په رسمي ډول نه ده تایید کړې.
.jpeg)
.jpeg)
