میرعلي (شال نیوز) : د شمالي وزیرستان د میرعلي تحصیل په ګڼو کلیو کې د پاکستان پوځ د نومبر په اوومه، د شنبې په سهار وختي د تلاشۍ عملیات پیل کړي دي. ځايي سرچینې وايي، امنیتي ځواکونه کلیو ته ننوتلي، په یو شمېر سرکاري او شخصي سکولونو، جوماتونو او کورونو کې ځای پر ځای شوي او د عملیاتو له امله د سیمې پر ورځني ژوند اغېز شوی دی.
د سرچینو په وینا، عملیات د میرعلي بازار، حسوخېل سړک، موسکي، حسوخېل، حیدرخېل، ایپي، هرمز، عیسوړۍ، زیرکي، خدي او د میرعلي تحصیل په نورو سیمو کې روان دي. ځايي سرچینې وايي، امنیتي ځواکونه د تلاشۍ لپاره کلیو ته ننوتلي او په ځینو سکولونو، جوماتونو او کورونو کې یې ځایونه نیولي دي.
د دغو عملیاتو له امله یو شمېر والدین خپل ماشومان سکولونو ته نه لېږي او د ځینو تعلیمي ادارو له خوا زده کوونکو ته د درسونو د بندېدو خبر ورکړل شوی دی. د حیدرخېل پبلک های سکول او کالج ادارې په یوه خپره کړې خبرتیا کې ویلي چې د موجوده امنیتي وضعیت له امله د نومبر په اوومه درسونه بند دي. ادارې له زده کوونکو غوښتي چې سکول ته دې نه ورځي او له والدینو یې غوښتنه کړې چې خپل ماشومان په کورونو کې وساتي.
.jpeg)
د برائيټ فیوچر پبلک های سکول او کالج ادارې هم والدینو ته په یوه پیغام کې ویلي چې د موجوده حالاتو له امله دې خپل ماشومان سکول ته نه لېږي. د دغې ادارې په وینا، د سکول د مرکزي دروازې او شاوخوا سیمو امنیتي وضعیت ته په پام دا سپارښتنه شوې ده.
ځايي سرچینې وايي، د میرعلي تحصیل په بېلابېلو سیمو کې د موبایل ټیلیفون سیګنلونه هم بند یا کمزوري شوي دي، چې له امله یې خلک له خپلو خپلوانو سره د اړیکو نیولو له ستونزو سره مخ دي.
له عملیاتو وړاندې د پوځ او قومي مشرانو جرګه
د اتمانزیو قومي جرګې مشر او د ایپي کلي اوسېدونکي ملک طارق داوړ شال نیوز ته ویلي چې د نومبر په شپږمه یې له نورو قومي مشرانو سره د میرعلي په کجوري فورټ کې له پوځي چارواکو سره جرګه کړې وه. د هغه په وینا، پوځي چارواکو د جرګې ګډونوالو ته ویلي وو چې په میرعلي او شاوخوا کلیو کې د تلاشۍ عملیات پیلوي او د دغو عملیاتو لپاره به پوځ کلیو ته ننوځي.
ملک طارق داوړ وايي، پوځي چارواکو قومي مشرانو ته ډاډ ورکړی چې که د عملیاتو پر مهال له وسله وال مقاومت سره مخ نه شي، نو لومړی به ډزې نه کوي. د نوموړي په وینا، پوځي چارواکو دا هم ویلي چې د بېړني حالت په صورت کې دې قومي مشران له پوځ سره اړیکه ونیسي او پوځ به د کلیو له اوسېدونکو سره د خوراکي توکو په ګډون د اړتیا وړ مرستې کوي.

ملک طارق داوړ او نورو قومي مشرانو په جرګه کې له پوځي چارواکو غوښتنه کړې چې د عملیاتو پر مهال دې عام خلک، د هغوی کورونه، جوماتونه، سکولونه او نورې شتمنۍ په نښه نه کړي. د قومي مشرانو په وینا، د عملیاتو پر مهال باید د ولسي خلکو خوندیتوب ته لومړیتوب ورکړل شي او داسې اقدامات ونه شي چې د خلکو ژوند او شتمنیو ته زیان ورسوي.
د ایپي قومي جرګه: زموږ کلی دې نور د جګړې له امله نه زیانمنېږي
د نومبر په شپږمه د جمعې له لمانځه وروسته د ایپي کلي په یوه جومات کې د دیني عالمانو، قومي مشرانو او عامو خلکو ګډه جرګه هم شوې وه. په دې جرګه کې د میرعلي او په ځانګړي ډول د ایپي کلي د امنیتي وضعیت، د پوځي عملیاتو او د ولسي خلکو د خوندیتوب په اړه خبرې شوې دي.
ملک طارق داوړ د جرګې له پای ته رسېدو وروسته په یوه ویډیويي بیان کې ویلي چې د تېرو څو کلونو ناامنۍ د ایپي کلي خلکو ته درانه زیانونه اړولي او دوی نور نه غواړي چې کلی یې د جګړې له امله زیانمن شي. نوموړي ویلي چې د جګړې دواړو خواوو په تېرو کلونو کې په بېلابېلو وختونو کې د یو بل پر ضد د خلکو کورونه، جوماتونه او سکولونه کارولي دي.
د هغه په وینا، د ایپي کلي خلکو تل له دواړو خواوو غوښتنه کړې چې عام خلک دې له جګړې لرې وساتي او د هغوی کورونه، جوماتونه او سکولونه دې د جګړې لپاره نه کاروي، خو له دغو غوښتنو سره سره د سیمې ځینې ځایونه کارول شوي دي. ملک طارق داوړ ویلي چې د ایپي کلي ټول جوماتونه اوس له وسله والو خالي دي او د هغه د معلوماتو له مخې، په هېڅ جومات کې وسله وال موجود نه دي.
نوموړي له امنیتي ځواکونو غوښتنه کړې چې که د تلاشۍ عملیات کوي، نو د خلکو کورونه، جوماتونه او نورې ودانۍ دې نه نړوي، که څه هم دغه ځایونه په تېرو وختونو کې د وسله والو له خوا کارول شوي وي. هغه خبرداری ورکړی چې که د عملیاتو پر مهال د خلکو کورونو، جوماتونو او نورو شتمنیو ته زیان ورسول شي، نو د ایپي کلي اوسېدونکي د سوله ییز احتجاج خپل آئيني حق خوندي ګڼي.
د میرعلي بازار اوسېدونکو ته په کورونو کې د پاتې کېدو سپارښتنه
بلخوا د ایپي کلي اوسېدونکي طارق ایپي په خپله فېسبوک پاڼه د میرعلي بازار او شاوخوا سیمو له خلکو غوښتي چې د عملیاتو پر مهال دې په خپلو کورونو کې پاتې شي. نوموړي لیکلي چې د میرعلي بازار په شاوخوا سیمو کې مېشت خلک دې له کورونو نه وځي، ځکه د هغه په وینا، د پوځ تګ راتګ او ځینې اقدامات روان دي.
1.jpeg)
د یوه کس د پوښتنې په ځواب کې، چې دا وضعیت به تر کومه دوام کوي، طارق ایپي ویلي چې د عملیاتو لپاره ټاکلې موده نه ده څرګنده. هغه زیاته کړې چې که څه هم د خلکو د تګ راتګ محدودول اسانه نه دي، خو د وضعیت د کنټرول او د وسله والو د احتمالي ننوتلو د مخنیوي لپاره به امنیتي ځواکونه په سیمه کې موجود وي.
تر اوسه پوځي چارواکو د خلکو پر تګ راتګ د محدودیتونو او د عملیاتو د مودې په اړه رسمي معلومات نه دي خپاره کړي.
د سکولونو بندېدو او د اړیکو پرې کېدو خلک اندېښمن کړي
په میرعلي کې د تلاشۍ د عملیاتو له پیل سره د ماشومانو د زده کړو، د خلکو د تګ راتګ او د ورځني ژوند په اړه اندېښنې هم راپورته شوې دي. ځايي سرچینې وايي، په حسوخېل، حیدرخېل، هرمز او نورو سیمو کې د یو شمېر سرکاري او شخصي سکولونو په ودانیو کې د امنیتي ځواکونو د ځای پر ځای کېدو له امله والدین خپل ماشومان سکولونو ته نه لېږي.
د ځینو سکولونو ادارو هم د موجوده امنیتي وضعیت له امله زده کوونکو ته د درسونو د بندېدو خبر ورکړی دی. تر اوسه دا نه ده څرګنده چې په ټول میرعلي تحصیل کې څومره سکولونه بند شوي او څومره زده کوونکي د دغو عملیاتو له امله له درسونو پاتې دي.
بلخوا د موبایل ټیلیفون د اړیکو بندېدو هم د خلکو ستونزې زیاتې کړې دي. ځايي سرچینې وايي، د اړیکو د بندېدو له امله د سیمې اوسېدونکي له خپلو خپلوانو سره په تماس نیولو او د حالاتو په اړه د معلوماتو په ترلاسه کولو کې له ستونزو سره مخ دي.
د عملیاتو د مودې او پایلو په اړه معلومات نشته
د میرعلي د تلاشۍ عملیات په داسې حال کې پیل شوي چې قومي مشرانو یوه ورځ وړاندې له پوځي چارواکو سره د ولسي خلکو د خوندیتوب، د کورونو او جوماتونو د ساتنې او د بېړنیو مرستو د برابرولو په اړه خبرې کړې وې.
1.jpeg)
تر اوسه دا نه ده څرګنده چې دغه عملیات به څو ورځې دوام وکړي، کومې سیمې به تر پوښښ لاندې راولي او د خلکو پر تګ راتګ به نور کوم محدودیتونه ولګول شي. د عملیاتو پر مهال د نیونو، وسله والو نښتو یا مرګ ژوبلې په اړه هم تر اوسه کره او خپلواک تایید شوي معلومات نه دي ترلاسه شوي.
د پاکستان پوځ تر اوسه د دغو عملیاتو د موخو، د هغوی د پراخوالي، په سکولونو، جوماتونو او کورونو کې د امنیتي ځواکونو د ځای پر ځای کېدو او له قومي مشرانو سره د شوو ژمنو په اړه رسمي بیان نه دی خپور کړی.
شال نیوز د عملیاتو په اړه د ځايي سرچینو معلومات، د سکولونو خپرې شوې خبرتیاوې او د اتمانزیو قومي جرګې د مشر ملک طارق داوړ څرګندونې ترلاسه کړې دي، خو د عملیاتو د ټولو جزئیاتو خپلواک تایید لا نه دی شوی.


عامر داوړ