جنیوا (شال نیوز) : د ملګرو ملتونو د بشري حقونو کارپوهانو له اروپايي هېوادونو غوښتي چې په افغانستان کي د ښځو او نجونو پر تعلیم او نورو بنيادي حقونو د لګول شویو بندیزونو تر ختمېدو پورې دې له طالبانو سره خپلې اړیکې نه عادي کوي.
کارپوهانو ویلي، له طالبانو سره د اړیکو د عادي کولو لپاره باید د بشري حقونو په برخه کي عملي پرمختګ وشي او ښځو او نجونو ته د تعلیم، کار او په ټولنیز ژوند کي د ګډون حقونه ورکړل شي.
دوی خبرداری ورکړی چې په افغانستان کي له ښځو او نجونو سره په پراخه او منظمه توګه د جنسیت په بنیاد امتیازي سلوک کېږي او دا ډول چلند د نړیوال قانون له مخې د بشریت خلاف جرم ګڼل کېدای شي.
د ملګرو ملتونو کارپوهانو پر اروپايي هېوادونو غږ کړی چې له طالبانو سره په خبرو اترو کي دې د ښځو او نجونو حقونو ته لومړیتوب ورکړي او یوازې په ژمنو دې اکتفا نه کوي، بلکې د عملي بدلون غوښتنه دې وکړي.
کارپوهانو له اروپايي هېوادونو څخه د افغان کډوالو د جبري ستنولو په اړه هم اندېښنه څرګنده کړې ده. دوی ویلي، اروپايي حکومتونه باید افغانستان ته د هر کډوال د بېرته لېږلو له پرېکړې مخکې د هغه شخصي حالات، امنیتي خطرونه او د بشري حقونو وضعیت په جلا توګه وڅېړي.
د کارپوهانو په وینا، د نړیوال قانون له مخې هېڅوک باید داسې هېواد ته په زور ونه لېږل شي چې ژوند، ازادي یا خوندیتوب یې پکی له خطر سره مخ وي.
په افغانستان کي د طالبانو له بیا واکمنېدو وروسته له شپږم ټولګي پورته د نجونو پر تعلیم بندیز لګېدلی او ښځې له پوهنتونونو او ګڼو سرکاري او غیرسرکاري نوکریو منع شوې دي.
طالبانو تر دې وړاندې ویلي چې د ښځو د تعلیم او کار په اړه یې پرېکړې د اسلامي شریعت او د افغانستان د ټولنیزو شرایطو له مخې کړې دي.
خو د ملګرو ملتونو د بشري حقونو کارپوهان ټینګار کوي چې له طالبانو سره د نړیوالو اړیکو پراختیا باید د افغان ښځو او نجونو د بنيادي حقونو د بحالېدو په برخه کي له څرګند او عملي پرمختګ سره تړلې وي.


شال نیوز