اسلام اباد (شال نیوز) : د پاکستان د اطلاعاتو وفاقي وزیر عطاالله تارړ ویلي چې مرکزي حکومت په خېبر پښتونخوا کي د آئین له مخې ګامونه پورته کړي او په صوبايي کابینه کي نور داسې کسان نشته چې د وسله والو ډلو خواخوږي کوي.
نوموړي د حکومت د پرېکړو دفاع کړې او پوښتنه یې کړې چې په یو هېواد کي د وسله والو ډلو پر ضد دوه بېلابېلې پالیسۍ څنګه عملي کېدای شي؟
عطاالله تارړ ویلي چې د پاکستان د آئین جوړوونکو اړوند مادې د همدې ډول حالاتو د مخنیوي او ورسره د مقابلې لپاره په آئین کي شاملې کړې وې.
د وفاقي وزیر له خبرو څرګندېږي چې مرکزي حکومت د خېبر پښتونخوا د امنیتي چارو او د وسله والو ډلو پر ضد د اقداماتو په اړه د یوې ګډې پالیسۍ پر عملي کولو ټینګار کوي.
د اکتوبر پر ۱۱مه په خېبر پښتونخوا کي د آئین د ۲۳۲مې او ۲۳۴مې مادې له مخې ایمرجنسي او ګورنر راج نافذ شول او صوبايي حکومت وځنډول شو.
تحریک انصاف د مرکزي حکومت تورونه رد کړي او د ایمرجنسۍ او ګورنر راج د پرېکړې په عدالت کي د چیلنج کولو اعلان یې کړی دی.


شال نیوز