تهران (شال نیوز) : د ایران د اسلامي شورا مجلس د ملي امنیت کمېسیون مشر وايي، طالبان د افغانستان او پاکستان پر پولو بشپړ واک او کنټرول نه لري او د دغو پولو په اوږدو کې بې ثباتي لیدل کېږي.
ابراهیم عزیزي وویل، د ایران سیستان او بلوچستان ولایت له دغو دواړو هېوادونو سره نږدې ۱،۳۰۰ کیلومتره ګډه پوله لري، چې د ګټو ترڅنګ یې یادې ستونزې هم رامنځته کړې دي.
هغه پرون د ایران دولتي ټلوېزیون سره په مرکه کې ویلي، د طالبانو او پاکستان د نه پاملرنې او د ایران د حکومت د مخالفو نیمهپوځي ډلو د پولو په اوږدو کې د حضور له امله، سیستان او بلوچستان له ناامنۍ سره مخ شوی دی.
عزیزي ادعا کړې چې په افغانستان او پاکستان کې له اوږدې مودې راهیسې نیمهپوځي ډلې حضور لري او ټینګار یې کړی چې د پولو تړل باید جدي لومړیتوب وبلل شي.
سیستان او بلوچستان ولایت په تېرو څو میاشتو کې، پر ایران د امریکا او اسراییل له جګړې وروسته، د ناامنۍ د زیاتوالي شاهد و، چې په پایله کې یې یو شمېر امنیتي سرتېري او نیمهپوځي کسان وژل شوي دي.


شال نیوز