شال نیوز
.jpeg)
اسلام اباد (شال نیوز) : د پاکستان د کورنیو چارو وفاقي وزیر محسن نقوي وايي، د حکومت او اپوزیسیون ترمنځ د خبرو پر مهال د خېبر پښتونخوا حکومت د امنیت او له وسله والو سره د مبارزې په اړه د یوې لیکلې موافقې لاسلیکولو او په ۷۲ ساعتونو کي د عملي پلان وړاندې کولو ته تیار شوی و، خو د خبرو په وروستي پړاو کي ترې شاته شو.
نقوي د اکتوبر پر څلورمه په خپل بیان کي وویل، په وړاندیز شوې موافقه کي د ۲۰۲۶ کال د پولیس قانون بیا کتنه، د امنیتي چارو له سیاسي اغېزو ساتل او په صوبه کي وسله والو ته د خوندي ځایونو د نه برابرېدو لپاره اقدامات شامل وو.
د نوموړي په وینا، په خبرو کي دا هم شامل وو چې د تحریک طالبان پاکستان او نورو وسله والو ډلو پر ضد به څرګند دریځ خپلول کېږي او د پولیسو او له وسله والو سره د مبارزې لپاره به زیاتې پیسې ځانګړې کېږي.
نقوي وايي، په وړاندیز شوې موافقه کي د افغان کډوالو په اړه د وفاقي حکومت د تګلارې ملاتړ، د افغان کډوالو ستنول، په خېبر پښتونخوا کي د افغان کډوالو د کمپونو ختمول او د افغانستان له لنډمهالي حکومت سره د صوبايي حکومت د مستقیمو اړیکو نه ساتل هم شامل وو.
د هغه په خبره، د پخوانیو قبایلي او اوسنیو ضم شوو ضلعو د امنیت په اړه پرېکړې، له امنیتي ادارو سره د صوبايي حکومت همکاري او د ملي عمل پلان عملي کول هم د خبرو برخه وه.
محسن نقوي ویلي، د خېبر پښتونخوا حکومت په لومړي سر کي پر دغو ټکو د لیکلې موافقې او په ۷۲ ساعتونو کي د عملي پلان وړاندې کولو ته تیار شوی و، خو د شنبې شپې د خبرو په وروستي پړاو کي ترې شاته شو.
نقوي ویلي، په داسې وخت کي چې خېبر پښتونخوا له سختو امنیتي ستونزو سره مخ ده، امنیت باید سیاسي نه کړل شي. د حکومت او اپوزیسیون ترمنځ د خبرو دویم پړاو له څو ساعتونو خبرو وروسته له موافقې پرته پای ته رسېدلی او تحریک انصاف خپل لانګ مارچ پر ځای ساتلی دی.
بل لور ته د خېبر پښتونخوا وزیراعلی سهېل اپریدي د تحریک انصاف خپله مسوده هم خپره کړې او د ګوند پر غوښتنو ولاړ دی.
تر اوسه تحریک انصاف او د خېبر پښتونخوا حکومت په خپلواکه توګه دا نه ده تایید کړې چې د محسن نقوي له خوا یاد شوي ټول امنیتي شرطونه یې منلي وو. له همدې امله د دغو شرطونو د منلو خبره د محسن نقوي د دریځ په توګه وړاندې کېږي.
.jpeg)
