نیویارک (شال نیوز) : د ایران دولتي رسنیو ویلي دي، چې د دغه هېواد د بهرنیو چارو وزیر ،عباس عراقچي، د امریکا له ځانګړي استازي سټیو وېټکوف سره په نیویارک کې مخامخ لیدلي دي.

رویټرز ،د سپتمبر په ۲۳مه، د ایراني دولتي رسنیو له قوله وايي، چې دا لیدنه د ملګرو ملتونو د عمومي اسمبلۍ په څنډه کې شوې او عراقچي پکې د هرمز تنګي د بېرته پرانیستلو لپاره د ایران شرطونه امریکايي لوري ته سپارلي دي.

د ایران دولتي رسنۍ وايي، په دغو شرطونو کې د ایراني بندرونو سمندري بندیز سمدستي ختمول، د ایران د کنګل شوو شتمنیو خوشي کول او د ایران له متحدو ډلو سره پر بېلابېلو جبهو د جګړې ختمول شامل دي.

دا د امریکا او ایران ترمنځ په نیویارک کې د روانو تماسونو مهم نوی پرمختګ دی. تر دې مخکې امریکايي چارواکو د خبرو او د منځګړو د هڅو یادونه کړې وه، خو د عراقچي او وېټکوف د مخامخ لیدنې روښانه تایید نه و شوی.

امریکايي او ایراني استازو په نیویارک کې درې ساعته خبرې کړې دي

ټرمپ ملګرو ملتونو ته: له ایران سره به توافق کوم، که نه اسلامي جمهوریت به له منځه یوسم

د امریکا ولسمشر ډونالډ ټرمپ هم ویلي چې امریکايي او ایراني چارواکو شاوخوا درې ساعته خبرې کړې او د ده په وینا، خبرې ښې مخ ته تللې دي. خو د عراقچي او وېټکوف د همدې مشخصې مخامخ لیدنې او ایران ته د ورکړل شوو شرطونو په اړه د امریکا له خوا تر اوسه جلا رسمي بیان نه دی خپور شوی.

د ایران او امریکا ترمنځ دا تماسونه داسې مهال شوي چې هرمز تنګی د دواړو هېوادونو په خبرو کې یوه مهمه موضوع ګرځېدلې ده. ایران ویلي چې د امریکا له خوا د پوځي فشار او سمندري بندیز په کمېدو سره د تنګي د بېرته پرانیستلو په اړه اقدام کولی شي.