شال نیوز
اسلام اباد (شال نیوز) : د پاکستان د اطلاعاتو وزارت ،د سپتمبر د ۲۱مې، په یو رسمي بیان کې تایید کړې چې پاکستان د افغانستان له پولې سره نږدې پر هغو ځایونو هوايي بریدونه کړي دي چې اسلام اباد یې د وسله والو پټنځایونه بولي.
وزارت ویلي دي، ېچې په دغو بریدونو کې له ۲۸ زیات وسله وال وژل شوي دي. د پاکستان حکومت وايي، په نښه شوي کسان له هغو ډلو سره تړلي وو چې په خیبر پښتونخوا کې په وروستیو بریدونو کې یې لاس درلود.
دا لومړی ځل دی چې د پاکستان حکومت د دغو هوايي بریدونو په اړه په رسمي بیان کې د عملیاتو پخلی کوي. تر دې مخکې پاکستاني امنیتي سرچینو رسنیو ته ویلي وو چې د افغانستان پولې ته نږدې یې د وسله والو پر پټنځایونو بریدونه کړي دي.
د اطلاعاتو وزارت ویلي دي، چې له هوايي بریدونو مخکې په کوهاټ، هنګو او ټل کې هم د استخباراتي معلوماتو پر بنسټ ځمکني عملیات شوي وو.
بل لور ته، د افغانستان طالبانو ویلي دي چې په کونړ او پکتیکا کې د پاکستان په هوايي بریدونو کې ملکي ځایونه په نښه شوي دي. د طالبانو د ویاند ذبیح الله مجاهد په وینا، په کونړ کې درې ملکي کسان وژل شوي او څلور نور، د ښځو په ګډون، ژوبل شوي دي.
د پاکستان حکومت وايي هدف یې وسله وال وو، خو طالبان وايي ملکي خلکو ته مرګ ژوبله اوښتې ده. د دواړو خواوو له لوري وړاندې شوې شمېرې تر اوسه په خپلواکه توګه نه دي تایید شوې.
.jpeg)
