شال نیوز
.jpeg)
یمن : د یمن حوثي ځواکونو د سور سمندر پر غاړه ستراتیژیک بندري ښار المخا نیولی دی. دا په وروستیو کلونو کې د یمن د جګړې پر کرښو یو له مهمو پوځي بدلونونو بلل کېږي.
رویټرز د سپjمبر پر ۱۰مه راپور ورکړی دی چې حوثي ځواکونه المخا ته ننوتلي او ښار یې نیولی دی. اسوشیټېډ پرېس هم د ځايي اوسېدونکو له قوله ویلي دي چې حوثي ځواکونه د ښار په بېلابېلو برخو کې لیدل شوي دي.
المخا د باب المندب تنګي شمال ته د سور سمندر پر غاړه پروت مهم بندري ښار دی. د دې ښار نیول حوثي ځواکونه باب المندب ته نور هم نږدې کوي. باب المندب د نړۍ د سمندري سوداګرۍ له مهمو لارو څخه دی چې سور سمندر له عدن خلیج او عربي سمندر سره نښلوي.
د وروستیو نښتو پر مهال حوثي ځواکونو د لوېدیځ ساحل په اوږدو کې پراخ پرمختګ کړی دی. د یمني پوځي سرچینو په وینا، هغوي تر دې مخکې حیس او د خالد بن ولید ستر پوځي کمپ هم نیولی و، چې له دې سره د المخا پر لور د پرمختګ لار ورته هواره شوه.
راپورونه وايي، چې د سعودي عربستان او د یمن د نړیوال پېژندل شوي حکومت ملاتړي ځواکونه له یو شمېر سیمو شاته شوي دي. د المخا نیول په ځانګړې توګه د طارق صالح تر مشرۍ لاندې ځواکونو ته لویه ضربه بلل کېږي، ځکه ښار د هغوي له مهمو پوځي او اکمالاتي مرکزونو څخه و.
.jpeg)
د المخا اهمیت یوازې پوځي نه دی. ښار باب المندب ته نږدې پروت دی او د حوثیانو تر کنټرول لاندې راتلل یې د سور سمندر د نړیوالو سمندري لارو په اړه اندېښنې زیاتولی شي.
تازه پرمختګ په داسې وخت کې شوی دی چې د حوثیانو او سعودي عربستان ترمنځ جګړه هم یو ځل بیا پراخه شوې ده. حوثیانو په وروستیو ورځو کې د سعودي عربستان پر ښارونو او د انرژۍ پر تاسیساتو بریدونه کړي، چې سعودي چارواکي وايي لږ تر لږه ۷۳ کسان پکې ټپیان شوي دي. سعودي عربستان په ځواب کې په یمن کې هوايي بریدونه زیات کړي دي.
د المخا له نیولو وروسته د جګړې پام اوس د باب المندب شاوخوا سیمو ته اوښتی دی. که حوثي ځواکونه د تنګي پر لور نور هم پرمختګ وکړي، دا به د یمن د جګړې ترڅنګ د سور سمندر پر نړیوالې سوداګرۍ او د تېلو پر لېږد هم اغېز لرلی شي.
.jpeg)
