شال نیوز
واشنګټن / عمان : ایران په اردن کې د امریکا تر استعمال لاندې موفق السلطي هوايي اډه په بالستیک توغندیو ویشتلې او تازه امریکايي راپورونه وايي، چې په برید کې څو امریکايي جنګي الوتکو ته زیان رسېدلی دی.
د رویټرز د سپتمبر د ۱۰مې د تازه راپور له مخې، په برید کې یوې اې ـ ۱۰ جنګي الوتکې ته سخت زیان رسېدلی او یو وزر یې خراب شوی، په داسې حال کې چې شاوخوا اتو اېف ـ ۱۵ جنګي الوتکو ته لږ زیان رسېدلی و. راپور وايي، زیانمنې اېف ـ ۱۵ الوتکې وروسته بېرته د الوتنې وړ ګرځول شوې دي.
د اردن وسله والو ځواکونو ویلي دي، چې د سپتمبر پر نهمه د ایران له خاورې د دغه هېواد پر لور ۲۰ بالستیک توغندي توغول شوي وو. د اردن د هوايي دفاع سیستمونو له دغو توغندیو ۱۸ په هوا کې شنډ کړي او دوه نور په داسې سیمو کې لوېدلي چې خلک پکې نه اوسېدل. چارواکي وايي، چې په برید کې مرګ ژوبله نه ده شوې.
د امریکايي جنګي الوتکو د زیان خبر د دغه برید په اړه تر ټولو تازه مهم پرمختګ دی. تر دې وړاندې اردني چارواکو یوازې د توغندیو د شنډولو او په غیر ابادو سیمو کې د دوو توغندیو د لوېدو خبره کړې وه.
د اردن پوځ ویلي دي، چې د توغندیو د پاتې شونو او ټوټو د راټولولو لپاره ځانګړي ټیمونه سیمو ته استول شوي او د هوايي دفاع او څار سیستمونه یې لا هم د احتمالي نویو بریدونو پر وړاندې په بشپړ چمتووالي کې دي.
دا برید د امریکا او ایران ترمنځ د روانې جګړې د نوې زیاتېدونکې مرحلې برخه ده. په وروستیو ورځو کې د دواړو هېوادونو ترمنځ هوايي او سمندري بریدونه زیات شوي او د هرمز تنګي له لارې د تېلو پر لېږد یې هم اغېز کړی دی.
د دغو بریدونو له امله د تېلو نړیوالې بیې بیا لوړې شوې دي. د برېنټ خامو تېلو بیه ،د سپتمبر په ۱۰مه، له ۱۰۰ ډالرو پورته پاتې شوې، په داسې حال کې چې د هرمز تنګي له لارې د تېلو د لېږد د لا ګډوډېدو اندېښنې زیاتې شوې دي.
.jpeg)
په همدې حال کې د امریکا ولسمشر ډونالډ ټرمپ د سپتمبر پر ۱۰مه ایران ته خبرداری ورکړی دی چې د نطنز اټومي مرکز ته نږدې په یوه غرنۍ او د ځمکې لاندې تاسیساتو لرونکې سیمه کې له داسې فعالیتونو ډډه وکړي چې واشنګټن یې ګواښ بولي. ټرمپ ویلي دي، که ایران هلته خپل فعالیت ته دوام ورکړي، امریکا یې په نښه کولی شي. ایران وايي، اټومي پروګرام یې سوله ییز دی.
تر دې دمه د اردن په برید کې د امریکايي سرتېرو د مرګ ژوبلې راپور نه دی ورکړل شوی، خو د امریکايي جنګي الوتکو د زیان تازه معلومات ښيي چې د ایران برید د امریکا پوځي وسایلو ته مستقیم مادي زیان رسولی دی.
.jpeg)
.jpeg)
.jpeg)
