تهران / کویت / ابوظبي : د ایران پوځ وايي، چې د «صاعقه» عملیاتو په ۳۱مه مرحله کې یې د کویت په احمد الجابر هوايي اډه او د متحده عربي اماراتو په المنهاد پوځي اډه کې د امریکا اړوند هدفونه په توغندیو او بریدګرو ډرونونو ویشتلي دي.

د ایران د پوځ د عامه اړیکو ادارې ،د سپتمبر په ۳مه، په یو بیان کې ویلي دي، چې په احمد الجابر اډه کې یې د سپوږمکۍ د اړیکو سیستمونه، د پوځي تجهیزاتو ګودامونه او د جنګي الوتکو هنګرونه هدف کړي دي. ایراني پوځ وايي، چې بریدونو د اړیکو ځینو سیستمونو او د جنګي الوتکو هنګرونو ته زیان رسولی دی، خو د دغو زیانونو اندازه تر اوسه د خپلواکو سرچینو له خوا نه ده تایید شوې.

د ایران پوځ دا هم ویلي دي چې په متحده عربي اماراتو کې یې د المنهاد په پوځي اډه کې د امریکايي ځواکونو د استوګنې ځایونه او راداري سیستمونه په توغندیو او ډرونونو هدف کړي دي.

د ایران په وینا، احمد الجابر اډه په سیمه کې د امریکايي ځواکونو د هوايي عملیاتو، څارنې او پوځي اکمالاتو مهم مرکز دی، او المنهاد اډه هم د بهرنیو ځواکونو د هوايي لېږد او ملاتړ لپاره کارول کېږي.

د کویت پوځ ،د سپتمبر په ۳مه، تایید کړې ده چې د دغه هېواد هوايي دفاع د ایران له لوري د توغندیو او ډرونونو د برید مقابله کړې ده. کویت دغه برید د خپل امنیت پر ضد مستقیم ګواښ بللی دی.

سپاه پاسداران وايي په اربیل کې یې پر امریکايي پوځي اډو توغندیز او ډرون برید کړی

پر ایران د امریکا په بریدونو کې لږ تر لږه ۱۲ کسان وژل شوي؛ تهران کویت، بحرین او اردن ته خبرداری ورکړ

اسوشیټېډ پرېس وايي، چې کویت ویلي د ایران توغندي او ډرونونه یې د هوايي دفاع له لارې مقابله کړي، خو د احمد الجابر اډې دننه د ایران له خوا د اعلان شویو مشخصو زیانونو بشپړ خپلواک تایید لا نه دی شوی. د متحده عربي اماراتو له خوا هم تر دې دمه د المنهاد اډې دننه د ایران د اعلان شویو زیانونو په اړه واضح رسمي تفصیل نه دی خپور شوی.

د ایران پوځ ویلي دي، چې دا بریدونه د امریکا د وروستیو بریدونو په غبرګون کې شوي او خبرداری یې ورکړی دی چې د امریکا د نورو بریدونو په صورت کې به ځوابونه دوام وکړي.

دا تازه بریدونه په داسې وخت کې شوي دي چې د امریکا او ایران ترمنځ جګړه یو ځل بیا پراخه شوې او په وروستیو ورځو کې د خلیج په یو شمېر هېوادونو کې د امریکايي پوځي تاسیساتو پر ضد د ایران د بریدونو راپورونه ورکړل شوي دي.