واشنګټن : د امریکا حکومت وايي، چې د هغو بهرنیو کسانو تر دوه لکه پورې غیرکډوالۍ ویزې ختمولی شي چې امریکا ته د سیاحت یا کاروبار په ویزه داخل شوي او وروسته یې په دغه هېواد کې د پناه غوښتنه کړې ده.

اسوشیټېډ پرېس ،د اګست پر ۲۴مه، د امریکا د بهرنیو چارو وزارت د ترلاسه شوو اسنادو او دوو امریکايي چارواکو په حواله راپور ورکړ دی چې دا ارزونه تر ډېره د بي ـ ۱ او بي ـ ۲ ویزو لرونکو کسانو ته متوجه ده. بي ـ ۱ ویزه عموماً د کاروباري سفر او بي ـ ۲ ویزه د سیاحت، د خپلوانو د لیدو او نورو لنډمهاله شخصي سفرونو لپاره ورکول کېږي.

د راپورونو له مخې، حکومت هغه ویزې څېړي چې د ۲۰۱۶م او ۲۰۲۶م کلونو ترمنځ ورکړل شوې دي او ویزه لرونکو یې وروسته په امریکا کې د پناه غوښتنه کړې ده.

د امریکا د بهرنیو چارو وزارت دریځ دا دی چې د سیاحت او کاروبار ویزې د لنډمهاله سفر لپاره ورکول کېږي. که یو کس له داخلېدو وروسته د پناه غوښتنه وکړي، چارواکي به وڅېړي چې ایا د هغه د سفر موخه له پېل څخه هم په امریکا کې د اوږدې مودې لپاره پاتې کېدل وو که نه.

د بهرنیو چارو وزارت یو ویاند ویلي دي، چې وزارت له کورني امنیت وزارت سره په ګډه د هغو کسانو دوسیې ارزوي چې امریکا ته په لنډمهاله ویزه راغلي دي، خو وروسته یې د پناه غوښتنه کړې ده.

امریکايي عدالت د ۷۵ هېوادونو د کډوالۍ ویزو بندیز ناقانونه وباله

امریکا په ټوله نړۍ کې د ویزو ملاقاتونه موقتاً ځنډوي

خو د ویزې ختمېدل په خپله د پناه غوښتنې د دوسیې د ختمېدو معنا نه لري.

که د یو کس بي ـ ۱ یا بي ـ ۲ ویزه ختمه شي، دا لازمي نه ده چې هغه به سمدستي ونیول شي یا له امریکا ووېستل شي. که د هغه د پناه غوښتنې دوسیه د امریکايي ادارو یا عدالتونو مخې ته روانه وي، قانوني بهیر یې دوام کولی شي.

په بل عبارت، ویزه او پناه غوښتنه دوه جلا قانوني مسئلې دي. ویزه یو کس ته د ټاکلې موخې لپاره امریکا ته د سفر اجازه ورکوي، خو پناه غوښتنه هغه قانوني غوښتنه ده چې یو کس پکې وايي خپل هېواد ته د ستنېدو په صورت کې له ځورونې، تعقیب یا جدي خطر سره مخ کېدی شي.

د امریکا د بهرنیو چارو وزارت تر اوسه نه دي ویلي چې په وروستي پړاو کې به د څو کسانو ویزې ختمې شي او نه یې دا روښانه کړې ده چې کومې دوسیې به تر ټولو لومړی وکتل شي. د تر دوه لکه کسانو شمېر د اسوشیټېډ پرېس له خوا د حکومتي اسنادو او امریکايي چارواکو په حواله ورکړل شوی دی.

چارواکي وايي، چې که پرېکړه عملي شي، د ویزو ختمول به په پړاوونو کې کېږي. دا اقدام د ولسمشر ډونالډ ټرمپ د حکومت د کډوالۍ د سختې تګلارې یوه بله برخه بلل کېږي.

د امریکا حکومت وايي، چې غواړي ډاډ ترلاسه کړي چې غیرکډوالۍ ویزې د هماغې موخې لپاره کارول کېږي چې ورباندې ورکړل شوې دي. خو د کډوالو د حقونو مدافع ډلې وايي، چې په امریکا کې له داخلېدو وروسته د پناه غوښتنه د قانون له مخې په خپله منع نه ده، او د حکومت دغه اقدام له قانوني ننګونو سره مخ کېدی شي.

د راپورونو له مخې، د ټرمپ د اوسني حکومت پر مهال تر دې مخکې هم له ۱۷۵ زرو زیاتې ویزې ختمې شوې دي. که د پناه غوښتونکو د تر دوه لکه ویزو پلان بشپړ عملي شي، دا به د ویزو د ختمولو له تر ټولو پراخو اقداماتو څخه وي.