میر علي (شال نیوز) : د شمالي وزیرستان په ګلشن جومات کې د سیاسي اتحاد شمالي وزیرستان تر سیوري لاندې د بېلابېلو سیاسي ګوندونو د سیمهییزو مشرانو غونډه شوې ده.
د نومبر ۵ مه په غونډه کې د جمعیت علمای اسلام، جماعت اسلامي، عوامي نیشنل ګوند، پښتونخوا ملي عوامي ګوند، پاکستان پیپلز ګوند او نیشنل ډیموکراټیک غورځنګ استازو ګډون کړی و.
د غونډې ګډونوالو د شمالي وزیرستان پر امنیتي وضعیت، روانو ستونزو او د سیمې پر وړاندې پر شته ننګونو خبرې کړې دي.
دا غونډه داسې مهال شوې چې حکومت په میرعلي تحصیل کې د پوځي عملیاتو اعلان کړی دی. د غونډې ګډونوالو د عملیاتو له اعلان وروسته د رامنځته شوي وضعیت، د امنیتي اندېښنو او پر ځايي خلکو د احتمالي اغېزو په اړه بحث کړی دی.
ګډونوالو د سیمې د ستونزو د هواري او د سولې د ټینګښت لپاره پر ګډې تګلارې د جوړولو ټینګار کړی دی.


شال نیوز