لاهور (شال نیوز) : د پاکستان او هند د سوداګرۍ شورا مشر نور محمد قصوري ویلي چې له هند سره د سوداګرۍ د بندېدو له امله پاکستان له ۲۰۱۹ کال راهیسې شاوخوا ۴۰ میلیارده ډالره اقتصادي زیان لیدلی دی.
قصوري د نومبر په دویمه په لاهور کې په یوه بیان کې ویلي چې له هند سره د سوداګرۍ محدودېدو پاکستاني صنعتونه اړ کړي چې خام مواد او نور اړین توکي له لرې پرتو هېوادونو څخه وارد کړي، چې ورسره د بار وړلو او تولید لګښتونه زیات شوي دي.
د هغه په وینا، د پاکستان د ټوکر جوړولو او درمل جوړولو صنعتونه له دغو محدودیتونو ډېر اغېزمن شوي دي.
نوموړي ویلي چې پاکستان د پنبې د کورني تولید د کمېدو له امله له برازیل، مصر، چین او امریکا څخه پنبه واردوي، چې د ده د اټکل له مخې، د ټوکر جوړولو صنعت ته یې شاوخوا پنځه میلیارده ډالره اضافي لګښت پېښ کړی دی.
قصوري زیاته کړې چې که له هند سره سوداګري بېرته پیل شي، د پاکستان د درمل جوړولو صنعت به وکولای شي د خامو موادو په واردولو کې هر کال له دوو تر دریو میلیارده ډالرو پورې لګښتونه کم کړي.
د سوداګرۍ شورا مشر ویلي چې پاکستان له نورو هېوادونو څخه بوره، کیمیاوي سره، سیمنټ، تېل، اوسپنه، فولاد، سبزي او درانه ماشینونه هم واردوي، په داسې حال کې چې د دغو توکو یوه برخه له هند څخه په نسبتاً کم لګښت ترلاسه کېدای شي.
د نوموړي په وینا، له هند سره د سوداګرۍ بیا پیل به د دواړو هېوادونو سوداګرو ته ګټه ورسوي او د پانګونې او سیاحت لپاره به هم نوې لارې پرانیزي.
پاکستان د ۲۰۱۹ کال په اګست کې د هند تر واک لاندې کشمیر د ځانګړي حیثیت له ختمېدو وروسته له دغه هېواد سره سوداګریزې اړیکې وځنډولې. د دواړو هېوادونو ترمنځ په ورپسې کلونو کې هم سوداګریز محدودیتونه پر ځای پاتې شول او په ۲۰۲۵ کال کې نور هم سخت شول.
قصوري له دواړو حکومتونو غوښتي چې خپل سیاسي اختلافونه د خبرو له لارې هوار کړي او د سوداګریزو اړیکو د بیا پیل لپاره ګامونه واخلي.
خو د پاکستان او هند د سوداګرۍ شورا د مشر له خوا د یاد شوي ۴۰ میلیارده ډالرو زیان د محاسبې تفصیلات نه دي خپاره شوي او دغه شمېره تر اوسه په خپلواکه توګه نه ده تایید شوې.


شال نیوز