اسلام اباد (شال نیوز) : پاکستان د هند پر ملکي او پوځي الوتکو د خپل هوايي حریم د کارولو بندیز د یوې بلې میاشتې لپاره غځولی دی. د پاکستان د هوايي ډګرونو ادارې ویلي چې دغه بندیز به د ډسمبر تر ۲۴مې نېټې پورې پر خپل ځای وي.
د پاکستان د هوايي ډګرونو ادارې د نومبر په ۱۹مه په یوه نوې خبرتیا کې ویلي چې د هند په نوم ثبت شوې الوتکې، د هندي هوايي شرکتونو خپلې الوتکې او هغه الوتکې چې دغو شرکتونو په کرایه اخیستې دي، د پاکستان له هوايي حریم څخه د تېرېدو اجازه نه لري.
د خبرتیا له مخې، دغه بندیز د کراچۍ او لاهور په هوايي سیمو کې هم عملي کېږي او د هند پوځي الوتکې هم پکې شاملې دي. پاکستان د ۲۰۲۵ کال په اپرېل کې د هند تر واک لاندې کشمیر په پهلګام سیمه کې له وسله وال برید وروسته د هند پر الوتکو خپل هوايي حریم وتاړه. په دغه برید کې ۲۶ کسان وژل شوي وو.
هند په برید کې پاکستان په لاس لرلو تورن کړی و، خو پاکستان دغه تورونه رد کړي وو او د پېښې د خپلواکو پلټنو غوښتنه یې کړې وه.
د دواړو هېوادونو ترمنځ کړکېچ وروسته پوځي نښتو ته وغځېد. د ۲۰۲۵ کال په مې کې د پاکستان او هند ترمنځ له څو ورځنیو نښتو وروسته، د مې په لسمه اوربند اعلان شو، خو د دواړو هېوادونو ترمنځ د هوايي حریم بندیزونه لا هم دوام لري.
هند هم د ۲۰۲۵ کال د اپرېل په ۳۰مه د پاکستان پر الوتکو د خپل هوايي حریم د کارولو بندیز لګولی و. د پاکستان د هوايي حریم د تړل کېدو له امله هندي هوايي شرکتونه اړ شوي چې اروپا او شمالي امریکا ته د خپلو ځینو الوتنو لپاره اوږدې لارې وکاروي.
د ایر انډیا هوايي شرکت د خپلو اټکلونو له مخې ویلي چې د پاکستان د هوايي حریم د بندېدو له امله یې د ځینو اوږدو الوتنو د تېلو لګښت تر ۲۹ سلنې پورې زیات شوی او د سفر وخت یې تر درېیو ساعتونو پورې اوږد شوی دی.
دغه شرکت اټکل کړی چې د بندیز د دوام له امله یې د مالیاتو له ورکړې مخکې پر کلنۍ ګټه شاوخوا ۴۵۵ میلیونه ډالره منفي اغېز پرېوتلی شي. د اوږدو بدیلو لارو کارول د هوايي شرکتونو لګښتونه زیاتوي او د ځینو مسافرو د سفر وخت هم اوږدوي.
پاکستان تر دې وړاندې هم څو ځله د هند پر الوتکو د خپل هوايي حریم بندیز غځولی دی. د نوې خبرتیا له مخې، دغه بندیز به د ډسمبر تر ۲۴مې نېټې د پاکستان په وخت د سهار تر څلورو بجو او ۵۹ دقیقو پورې نافذ وي.
د پاکستان او هند ترمنځ د ۲۰۲۵ کال له پوځي نښتو راهیسې له اتلسو میاشتو زیات وخت تېر شوی، خو دواړو هېوادونو لا هم د یو بل د الوتکو پر وړاندې لګول شوي بندیزونه نه دي ختم کړي. تر اوسه دواړو هېوادونو د هوايي حریمونو د بېرته پرانیستلو لپاره کومه مشخصه نېټه نه ده اعلان کړې.


شال نیوز