پېښور (شال نیوز) : د خېبر پښتونخوا د اطلاعاتو او عامه اړیکو سلاکارې ثمر هارون بلور ادعا کړې چې د صوبې پخوانی اعلا وزیر سهیل اپریدی، د هغه ورور او د تره زوی د فساد له تورونو سره مخ دي.

ثمر بلور په پېښور کې یوې خبري غونډې ته ویلي چې سهیل اپریدی دا مهال په حفاظتي حراست کې دی او د هغه پر ضد د تورونو د رسمي پاڼې له وړاندې کېدو وروسته به د قضیې ارزونه وشي. هغې د پخواني صوبايي حکومت په بېلابېلو پرمختیايي منصوبو کې د اربونو روپیو د فساد تورونه هم لګولي دي.

د ثمر بلور په وینا، د صوبې په بېلابېلو ضلعو کې په غیرقانوني توګه قراردادونه ورکړل شوي او په دغو معاملو کې د سهیل اپریدي د ورور او د تره زوی د احتمالي لاس لرلو معلومات هم مخې ته راغلي دي.

کونډي: سهیل افریدی خوندي دی، خو د راتلونکي په اړه یې څوک څه نه شي ویلی

د سهیل اپریدي په ګډون د پنځو کسانو د نیولو امر شوی

د جمعیت علمای اسلام له مشر مولانا فضل الرحمان سره د اړیکو په اړه د یوې پوښتنې په ځواب کې ثمر بلور وویل چې هغه ته درناوی لري، خو بېلابېلې سیاسي موضوعګانې باید له یو بل سره ونه تړل شي.

هغې هیله څرګنده کړه چې مولانا فضل الرحمان به د خېبر پښتونخوا د پرمختګ لپاره له صوبايي حکومت سره همکاري وکړي. د ثمر بلور د دغو تورونو په اړه د سهیل اپریدي، د هغه د ورور او د تره زوی دریځ لا نه دی وړاندې شوی. همدارنګه، د فساد د ادعاوو په اړه د کومې عدالتي پرېکړې معلومات نه دي ورکړل شوي.