شال نیوز
واشنګټن (شال نیوز) : د امریکا ولسمشر ډونالډ ټرمپ لا پر ایران د بیا برید وروستۍ پرېکړه نه ده کړې، خو د امریکا دفاع وزارت ته ویل شوي چې د احتمالي پوځي عملیاتو لپاره خپل تیاری بشپړ کړي.
امریکايي خبري وېبپاڼې اکسیوس د اکتوبر پر اوومه د امریکايي چارواکو له قوله راپور ورکړی چې پر ایران د نویو بریدونو لپاره تر اوسه کومه نېټه نه ده ټاکل شوې، خو په راتلونکو درېیو یا څلورو اوونیو کي د پوځي اقدام پر امکان غور روان دی.
د راپور له مخې، د امریکا مرکزي پوځي قوماندانۍ ته ویل شوي چې د ایران پر ضد د پراخو بریدونو د بیا پیل لپاره خپل پلانونه بشپړ کړي. په دغو پلانونو کي د ایران پر اټومي تاسیساتو، د تېلو او انرژۍ پر مرکزونو او نورو مهمو پوځي ځایونو د بریدونو امکان هم شامل دی.
اکسیوس لیکلي چې ټرمپ په کمپ ډېوېډ کي له خپلو امنیتي سلاکارانو سره د ایران پر وضعیت خبرې کړې دي. نوموړي په وروستیو ورځو کي د اسرائیلو له وزیراعظم بنیامین نتنیاهو سره هم دوه ځله ټیلیفوني خبرې کړې دي.
د سپینې ماڼۍ له خوا د پوځي پلانونو د چمتو کولو غوښتنه په دې معنا نه ده چې د برید پرېکړه شوې ده. د راپور له مخې، وروستۍ پرېکړه به ټرمپ کوي. دا راپور په داسې وخت کي خپور شوی چې د هرمز تنګي پر سر د امریکا او ایران ترمنځ کړکېچ زیات شوی دی.
رویټرز د اکتوبر پر اوومه د ایران د سپاه پاسداران د یوه سلاکار محمدرضا نقدي له قوله راپور ورکړی چې تهران د هرمز تنګي د هغو سمندري لارو د تړلو ګواښ کړی چې ایران یې ناقانونه بولي.
رویټرز په یوه بل راپور کي ویلي چې د سپتمبر له ۲۸مې د اکتوبر تر پنځمې پورې په هرمز تنګي کي د تېلو پر بېړیو د بریدونو، د برید د هڅو او ګواښونو لږ تر لږه ۱۲ پېښې ثبت شوې دي. د ایران پر ضد د نویو بریدونو په اړه د ټرمپ د حکومت دننه هم بېلابېل نظرونه شته.
د اټلانټیک مجلې د راپور له مخې، ځینې امریکايي چارواکي پر ایران د پوځي فشار زیاتولو پلوي کوي، خو نور بیا اندېښنه لري چې نوي بریدونه به جګړه نوره هم پراخه کړي، امریکايي ځواکونه به له خطر سره مخ کړي او د تېلو بیې به لوړې کړي.
امریکا په منځني ختیځ کي د خپلو ځواکونو د زیاتولو لپاره هم ګامونه اخیستي دي. د راپورونو له مخې، واشنګټن سیمې ته د یوې بلې الوتکه وړونکې جنګي بېړۍ او زرګونو سمندري سرتېرو د لېږلو پر تیاري بوخت دی.
د امریکا او ایران ترمنځ د اختلاف یوه بله مهمه موضوع د ایران اټومي پروګرام دی. واشنګټن غواړي تهران د یورانیمو د غني کولو په برخه کي محدودیتونه ومني، خو د دواړو هېوادونو ترمنځ په دې اړه اختلافونه لا نه دي هوار شوي.
تر اوسه سپینې ماڼۍ پر ایران د پراخو پوځي عملیاتو د بیا پیل اعلان نه دی کړی او دا هم نه ده څرګنده چې ټرمپ به کله وروستۍ پرېکړه کوي.
.jpeg)
