برلین (شال نیوز) : د جرمني حکومت وايي، د دغه هېواد بېلابېلو صوبو ۴۸۸ افغانان افغانستان ته د بېرته لېږلو لپاره د جرمني مرکزي پولیسو ته ورپېژندلي دي.

حکومت دا معلومات د پارلمان د غړې کلارا بونګر د پوښتنې په لیکلي ځواب کي ورکړي دي. د معلوماتو له مخې، دغه کسان د جولای له اتمې د سپټمبر تر ۱۸مې پورې د بېرته لېږلو لپاره ورپېژندل شوي دي. د پولیسو د معلوماتو له مخې، په دغو ۴۸۸ کسانو کي ۲۶۷ کسان په کوم جرم کي ککړ نه دي.

دا د جرمني د حکومت په تګلاره کي نوی بدلون دی. افغانستان ته د افغانانو د بېرته لېږلو بهیر تر دې وړاندې تر ډېره پر هغو کسانو متمرکز و چې په جرمونو کي ککړ وو یا امنیتي خطر بلل کېدل.

خو د جرمني د کورنیو چارو وزیر الکساندر دوبرینټ ویلي، افغانستان ته بېرته لېږل به نور یوازې پر دغو کسانو محدود نه وي. هغه افغانان هم بېرته لېږل کېدای شي چې په جرمني کي د پاتې کېدو قانوني حق نه لري.

کله چې طالبانو کابل ونیو، لوېدیځ افغانانو ته دروازې پرانیستې؛ اوس یې ولې تړي؟

د جرمني حکومت د طالبانو له چارواکو سره هم د افغانانو د بېرته لېږلو په اړه خبرې کړې دي. حکومت وايي، له طالبانو سره دا خبرې د طالبانو د حکومت د رسمي پېژندلو معنا نه لري.

د کډوالو د حقونو ډلې افغانستان ته د افغانانو د بېرته لېږلو پر پراخېدو نیوکه کوي. دوی وايي، د طالبانو تر واک لاندې افغانستان کي د بشري حقونو وضعیت ته په پام، د افغانانو جبري ستنول د اندېښنې وړ دي.

د جرمني حکومت بیا وايي، هغه کسان چې په دغه هېواد کي د پاتې کېدو قانوني حق نه لري، افغانستان ته به یې د بېرته لېږلو بهیر دوام وکړي.