شال نیوز
.jpeg)
اسلام اباد : د افغانستان لپاره د پاکستان پخواني ځانګړي استازي اصف دراني د کوهاټ له خونړي برید وروسته ویلي دي، چې یوازې پوځي عملیات په پاکستان کې د وسله والو ډلو د ختمولو لپاره کافي نه دي او حکومت باید د خلکو باور ترلاسه او خپل واک پیاوړی کړي.
دراني ،د سپتمبر په ۱۹مه، ویلي دي، چې د کوهاټ برید یو ځل بیا د هېواد په ځینو برخو کې د حکومتولۍ کمزوري مخې ته راوړې ده. د هغه په وینا، د وسله والو پر ضد مبارزه یوازې په پوځي ځواک نه شي ګټل کېدی او د خلکو ملاتړ او همکاري هم ضروري ده.
هغه ویلي دي، چې په خیبر پښتونخوا او بلوچستان کې پر حکومت د خلکو باور مخ په کمېدو دی او دا حالت د وسله والو ډلو پر ضد مبارزه نوره هم ستونزمنوي. دراني ویلي، پاکستان باید د وسله والو ډلو د بهرني ملاتړ ترڅنګ په هېواد کې دننه د هغوي د شبکو، مرستندویانو او مالي سرچینو په اړه هم ځوابونه ولري.
هغه پوښتنه کړې ده چې وسله والې شبکې، د هغوي مرستندویان او مالي سرچینې څنګه په پاکستان کې دننه فعالیت کولی شي. د دراني په وینا، ښه حکومتولي، سیاسي خبرې او په امنیتي چارو کې د ځايي خلکو ګډون د وسله والو ډلو پر ضد د اوږدمهاله مبارزې مهمې برخې دي.
هغه ویلي دي، چې هدف باید یوازې د وسله والو وژل نه وي، بلکې د حکومت د واک او اعتبار ټینګول او د خلکو د باور ترلاسه کول هم ضروري دي. دراني خبرداری ورکړی چې د خلکو له باور پرته یو امنیتي عملیات ښيي پای ته ورسېږي، خو وروسته بله حمله وشي یا نوې وسله واله شبکه جوړه شي. د هغه په وینا، د کوهاټ په څېر بریدونو د دې ستونزې پراخ اړخونه بیا مخې ته راوستي دي.
دراني دا څرګندونې وروسته له هغې کړې دي چې د جمعې، د سپتمبر ۱۸مې، په ورځ وسله والو د کوهاټ پر پخواني پولیس لاینز خونړی برید وکړ. د فرانسې خبري اژانس، اې اېف پي، د یو لوړپوړي پولیس چارواکي له قوله ویلي چې په برید کې لږ تر لږه ۳۱ کسان وژل شوي، چې ۱۶ یې پولیس دي، او تر ۱۰۰ ډېر کسان ژوبل شوي دي.
.jpeg)
د برید پر مهال پولیس او د هغوي د کورنیو غړي د پولیس لاینز په جومات کې د جمعې لمانځه ته راټول شوي وو. د پولیسو په وینا، برید د چاودېدونکو موادو له ډک موټر سره پېل شو او وروسته وسله وال پولیس لاینز ته ننوتل او له امنیتي ځواکونو سره یې نښته پېل کړه.
د کوهاټ پخوانی پولیس لاینز د ضلعې د پولیسو مرکز دی او د ترهګرۍ ضد ادارې، سي ټي ډي، سپېشل برانچ او د پولیسو د نورو څانګو دفترونه هم پکې دي. د پولیسو په وینا، د شاوخوا ۲۱ ساعتونو عملیاتو وروسته د پولیس لاینز ودانۍ له بریدګرو پاکه شوه او ټول اته بریدګر ووژل شول.
اتحاد المجاهدین پاکستان، چې له تحریک طالبان پاکستان سره تړلې وسله واله ډله بلل کېږي، د برید ذمه واري منلې ده.
.jpeg)
