شال نیوز
کابل : د طالبانو ویاند ذبیح الله مجاهد ویلي، هغه افغان محصلان چې د پاکستان له طبي پوهنتونونو او کالجونو ایستل کېږي، د افغانستان په پوهنتونونو او نورو لوړو زدهکړو ادارو کې به جذب شي.
مجاهد د افغان طبي محصلانو د ایستلو پرېکړه «غیرانساني او د خواشینۍ وړ» بللې او له پاکستانه یې غوښتي چې په دې پرېکړه بیا غور وکړي.
هغه ،د سپتمبر په ۹مه، خبریالانو ته ویلي:
«د اسلامي امارت د لوړو زدهکړو وزارت بشپړ چمتووالی لري، څو هغه افغان محصلان چې له پاکستانه وتلو ته اړ کېږي، د هېواد په تحصیلي بنسټونو کې جذب کړي.»
په اسلاماباد کې د طالبانو سفارت هم د افغان طبي محصلانو د ایستلو پر پرېکړې خواشیني څرګنده کړې ده.
سفارت په یوه اعلامیه کې له پاکستاني تعلیمي ادارو او نړیوالو طبي، تعلیمي او بشري ادارو غوښتي چې د افغان محصلانو د زدهکړو حق خوندي کړي. سفارت ویلي، علم، زدهکړې او بشري اړیکې باید له سیاسي اختلافاتو خوندي وساتل شي.
د افغانستان د پخواني ولسمشر ځانګړي استازي محمد عمر داودزي هم د پاکستان له سیاسي مشرانو، پوهنتونونو او مدني ټولنې غوښتي چې د افغان محصلانو د ایستلو مخه ونیسي.
په افغانستان کې د پاکستان پخواني سفیر منصور احمد خان او د افغانستان لپاره د پاکستان پخواني ځانګړي استازي اصف دراني هم پر دې پرېکړې اندېښنه څرګنده کړې او د بیاکتنې غوښتنه یې کړې ده.
د پاکستان د پارلمان غړي او د ملي ډیموکراتیک غورځنګ مشر محسن داوړ بیا ویلي، د افغان محصلانو ایستل «شرموونکې او غیرانساني» پرېکړه ده. هغه ویلي، په ځانګړي ډول ښځینه افغان محصلان په افغانستان کې د طالبانو د محدودیتونو له امله خپلو زدهکړو ته دوام نه شي ورکولای.
دا لانجه وروسته له هغې راپورته شوه چې د پنجاب د روغتیايي علومو پوهنتون په دغه ایالت کې ۶۴ اړوندو پوهنتونونو او طبي او غاښونو پوهنځیو ته په یوه مکتوب کې لارښوونه وکړه چې د افغان محصلانو په اړه د پاکستان نافذه پالیسي عملي کړي او اړوند محصلان افغانستان ته ستانه کړي.
د افغان محصلانو د ایستلو پرېکړې په افغانستان او پاکستان کې پراخ غبرګونونه راپارولي او یو شمېر سیاستوالو او پخوانیو چارواکو له اسلاماباده غوښتي چې زدهکړې له سیاسي اختلافاتو جلا وساتي.
.jpeg)
.jpeg)
.jpeg)
.jpeg)
.jpeg)
