شال نیوز
.jpeg)
جاکارتا : د اندونیزیا د پلازمېنې جاکارتا هوايي ډګرونه د اناک کراکاټو اور شیندونکي غره د پرله پسې چاودنو او په فضا کې د ایرو د خپرېدو له امله له دوه ورځني بند وروسته د سپتمبر پر ۸مه، د سه شنبې په لومړیو ساعتونو کې بېرته د الوتنو لپاره پرانیستل شول.
هوايي ډګرونه وروسته له هغه وتړل شول چې اناک کراکاټو څو ځله وچاودېد او د ایرو لویې ورېځې یې د جاکارتا او شاوخوا سیمو پر لور خپرې شوې. د اور شیندونکي غر ایش د الوتکو لپاره جدي خطر ګڼل کېږي، ځکه دا وړې ذرې د الوتکو انجنونو ته ننوتلی، د انجن کار ګډوډولی او د پیلوټانو لید کمولی شي.
چارواکو د همدې خطر له امله د کورنیو او نړیوالو الوتنو تګ راتګ ودرولو او ځینې الوتکې یې نورو هوايي ډګرونو ته واړولې. د هوايي ډګرونو تړل کېدو په سیمه کې د الوتنو پراخه ګډوډي رامنځته کړه او زرګونه مسافر د خپلو سفرونو د ځنډېدو یا لغوه کېدو له ستونزې سره مخ شول.
د اندونیزیا د ټرانسپورټ وزارت وايي، چې د سوکارنو ـ هاتا او حلیم پرداناکوسوما هوايي ډګرونو او د باندونګ حسین ساسترانیګارا هوايي ډګر د شپې له دولسو بجو وروسته خپل فعالیت بېرته پېل کړ.
د دوو ورځو د بند پر مهال ۲،۹۶۱ کورنۍ او نړیوالې الوتنې لغوه، ځنډېدلې یا نورو هوايي ډګرونو ته اړول شوې او شاوخوا ۳۴۱ زره مسافر اغېزمن شول.
چارواکي وايي، چې د بودیارټو کوروګ او پونډوک کابې هوايي ډګرونه هم د سه شنبې په سهار بېرته پرانیستل شول، خو په لامپونګ کې رادین اېنتن دویم او محمد توفیق کیماس هوايي ډګرونه لا تړلي وو.
د هوايي ډګرونو د بیا پرانیستلو پرېکړه وروسته له هغه وشوه چې د هوايي چلند چارواکو د ایرو د خپرېدو حالت وارزاوه او په ځینو سیمو کې یې د الوتنو لپاره شرایط خوندي وبلل.
.jpeg)
چارواکي بیا هم وايي، چې که د اور شیندونکي غره فعالیت زیات شي او ایش یو ځل بیا د الوتنو مسیرونو ته ورسېږي، د هوايي تګ راتګ محدودیتونه بېرته لګېدلی شي.
اناک کراکاټو لا هم فعال دی او د سه شنبې په لومړیو ساعتونو کې یې بیا چاودنې کړې دي. چارواکو خلکو ته ویلي دي چې د اور شیندونکي غر تر درې کیلومتره شاوخوا سیمې ته دې نه ورځي او د خوندیتوب لارښوونې دې تعقیب کړي.
اناک کراکاټو د اندونیزیا له فعالو اور شیندونکو غرونو څخه دی او په سوندا تنګي کې د جاوا او سوماترا ټاپوګانو ترمنځ پروت دی. دغه غر په تېرو کلونو کې هم څو ځله چاودېدلی او د ایرو د خپرېدو له امله یې د سیمې پر هوايي تګ راتګ اغېز کړی دی.
.jpeg)
