د اسلام‌اباد پوليسو د روان ۲۰۲۶ کال په لومړيو پنځو مياشتو کې د جنسي تېريو او تښتونو لږ تر لږه ۴۳۲ مقدمې ثبت کړې دي. د پوليسو سرچينو د معلوماتو له مخې، په دغو مقدمو کې ۵۵ د جنسي تېريو او ۳۷۷ د تښتونو قضیې شاملې دي.

د شمېرو له مخې، د جنسي تېريو له ۵۵ قضيو څخه ۱۵ په سوان زون، ۱۳ په صدر زون، ۱۲ په کليوالي زون، ۹ په صنعتي سيمه زون او ۶ په ښار زون کې ثبت شوې دي.

همداراز د تښتونو له ۳۷۷ قضيو څخه ۹۹ په صدر زون، ۸۹ په سوان زون، ۷۶ په کليوالي زون، ۴۴ په ښار زون او ۲۹ په صنعتي سيمه زون کې درج شوې دي.

د راپور له مخې، د فبرورۍ په ۲۸مه د پنډوريان په سيمه کې په درې کسانو پر يو هلک د جنسي تېري تور لګېدلی او ويل کېږي چې د پېښې ويډيو يې هم جوړه کړې وه.

پوليسو د پاکستان د جزا قانون د ۳۷۵-ای مادې لاندې درې مقدمې هم ثبت کړې دي چې پکې درې نجونې او يو هلک قربانيان بلل شوي دي.

په يوه بله پېښه کې د مارچ په ۱۹مه د اسلام‌اباد د ای-۱۶ سيمي يوه نجلۍ د پنځو کسانو له خوا د ډله‌ ييز جنسي تېري ښکار شوې ده. همداراز د مارچ په ۳۱مه د سهاله په سيمه کې پر يو هلک د درې کسانو له خوا د ورته پېښې دعوه شوې ده.

د پوليسو د معلوماتو له مخې، د پاکستان د جزا قانون د ۳۷۶ مادې لاندې ۲۴ مقدمې ثبت شوې دي. په دغو قضيو کې ۱۵ نجونې، درې ښځې او يو هلک قربانيان دي. په يوه پېښه کې د اپرېل په ۱۵مه د مهربان ټاون په سيمه کې يو ۱۵ کلن هلک د وسلې په زور د دوو کسانو له خوا د جنسي تېري ښکار شوی و.

سرچيني وايي، د ۳۷۶-سي مادې لاندې ۱۰ نورې مقدمې هم ثبت شوې دي چې پکې اته نجونې او دوه هلکان قربانيان دي.

بلخوا پوليسو د پاکستان د جزا قانون د ۳۶۵ مادې لاندې، چې د پټ ساتلو او ناقانونه بندي کولو په نيت د تښتونې په اړه ده، ۶۹ مقدمې ثبت کړې دي. په دغو پېښو کې ۶۴ نارينه او پنځه ښځې تښتول شوي دي.

د دغو قضيو له ډلې په يوه پېښه کې يو سړی د مې په څلورمه د اسلام‌اباد د اېف-۶/۱ سيمه کې له خپل کور بهر تښتول شوی و، چې مړی يې يوه ورځ وروسته د خېبر پښتونخوا د مردان ضلعې څخه ترلاسه شوی و.

د راپور له مخې، د دغو پېښو د زياتوالي په اړه د اسلام‌اباد پوليسو چارواکو ته د دريځ اخيستلو لپاره څو ځله هڅې شوې، خو هغوي په دې اړه څه نه دي ويلي.