د امریکا ولسمشر ډونالډ ټرمپ په خپله رسمي ټولنیزه پاڼه ټروټ سوشل کې یو خورا مهم او بیړنی اعلان کړی دی. ټرمپ په خپل دغه بیان کې ويلي چې هغه د ایران او امریکا ترمنځ د دوه اونیو لپاره د مشروط اوربند وړاندیز منلی دی.

دا پرمختګ په داسې حال کې مخې ته راځي چې یوازې څو ساعته وړاندې ټرمپ ایران ته د "یو بشپړ تمدن د له منځه وړلو" سخت ګواښ کړی و. ټرمپ وویل چې دا اوربند به دوه اړخیز وي او هدف یې د یوې لويې جګړې مخنیوی او په سیمه کې د روان تاوتریخوالي کمول دي.

د ولسمشر ټرمپ د دغه اعلان سره سم، د سپینې ماڼۍ ویاندې هم په رسمي ډول تایید کړه چې پاکستان په دې حساس وخت کې د اوربند په رامنځته کولو او د دواړو هېوادونو ترمنځ د کړکېچ په کمولو کې یو کلیدي او خورا مهم رول لوبولی دی. امریکا په ښکاره د پاکستان د هغو ډیپلوماټیکو هڅو ستاینه وکړه چې له امله یې د جګړې لمبې سړې شوې.

د تېرې شپې بريدونه او د ايران اوسنی حالت

دغه اوربند د تېرې شپې له هغو درنو بریدونو وروسته اعلانېږي چې د سعودي عربستان د تېلو پر تاسیساتو شوي وو او په ځواب کې یې امریکا او متحدینو یې د ایران په داخل کې سلګونه هدفونه ویشتلي وو. که څه هم ټرمپ د اوربند اعلان کړی، خو د ایران د حکومت او د سپاه پاسداران (IRGC) لخوا تر اوسه د دغه اعلان په اړه هیڅ ډول رسمي غبرګون نه دی ښودل شوی. نړۍ لا هم په انتظار ده چې تهران به د ټرمپ دغه مشروط وړاندیز ته څه ځواب ورکړي.

د پاکستان ډپلوماټيک دريځ

که څه هم امریکا او سپینې ماڼۍ په ښکاره ډول د اوربند په رامنځته کولو کې د پاکستان د رول ستاینه کړې، خو د پاکستان حکومت تر اوسه په رسمي او ښکاره ډول دا ادعا نه ده کړې چې دوی په دې منځګړیتوب کې بشپړ بریالي شوي دي. اسلام اباد لا هم په ډېر احتیاط سره ګامونه پورته کوي او هڅه کوي چې د سیمې د ثبات لپاره خپلې هڅې په خاموشه ډیپلوماسۍ سره پر مخ یوسي.

د پاکستان د بهرنیو چارو وزارت په خپله وروستۍ مطبوعاتي اعلامیه کې د سعودي عربستان پر تاسیساتو بریدونه غندلي او د سیمې د امنیت لپاره یې پر خبرو اترو ټینګار کړی دی. دا مهال ټول پام د تهران غبرګون ته اوښتی چې ایا دغه دوه اونیز اوربند به په سیمه کې د یوې دایمي سولې لامل شي او که نه.