بټګرام (شال نیوز) : د خېبر پښتونخوا د بټګرام ضلعې په الایي تحصیل کې د ځمکې د ملکیت پر سر د دوو قبیلو ترمنځ په وسله واله نښته کې اووه کسان وژل شوي او لس نور ژوبل شوي دي.
پولیس وايي، دا پېښه د جمعې او خالي ترمنځ شپه شاوخوا یوولس نیمې بجې د الایي تحصیل په بلیجه سیمه کې شوې ده. د پولیسو د معلوماتو له مخې، په وژل شویو کسانو کې درې د کوهستاني قوم او څلور د ګلال الایي قوم ځوانان شامل دي.
پولیس وايي، د دواړو خواوو ترمنځ د ځمکې د ملکیت پر سر له ډېرې مودې راهیسې لانجه روانه ده او تر دې وړاندې هم د همدې شخړې له امله د ډزو او تاوتریخوالي پېښې شوې دي.
د وژل شویو او ژوبلو کسانو نومونه تر اوسه نه دي څرګند شوي. دا هم نه ده معلومه چې د ژوبلو کسانو روغتیايي حالت څنګه دی او ایا پولیسو د پېښې په تړاو څوک نیولي دي. د بټګرام د الایي او د کوهستان د کولۍ پالس د قبیلو ترمنځ د ځمکو د ملکیت پر سر شخړې پخوانۍ سابقه لري.
په ۲۰۲۱ کال کې هم د الایي قبیلو مشرانو له ضلعي انتظامیې غوښتي وو چې د چور درې له لانجمنې ځمکې څخه وسله وال کسان وباسي. هغه مهال د دواړو سیمو د خلکو ترمنځ د ځمکې د ملکیت پر سر تاوتریخوالی زیات شوی و.
په ۲۰۲۳ کال کې د هزاره ډویژن انتظامیې د الایي او کولۍ پالس د قبیلو ترمنځ د نورې نښتې د مخنیوي لپاره چور درې ته د وسله والو کسانو پر ورتګ بندیز لګولی و. د هغه وخت چارواکو ویلي وو چې د ځمکې د ملکیت لانجه باید د خبرو اترو او قانوني لارو هواره شي.
خو د نومبر د ۲۱مې د تازه نښتې په اړه لا دا نه ده تایید شوې چې ایا دا پېښه هم د چور درې له پخوانۍ لانجې سره تړاو لري او که د ځمکې پر سر جلا شخړه ده.
تر اوسه د بټګرام ضلعي انتظامیې د تازه پېښې د پلټنو، د امنیتي اقداماتو او د دواړو خواوو ترمنځ د ممکنه روغې جوړې په اړه تفصیلي معلومات نه دي خپاره کړي.


شال نیوز