لکي مروت (شال نیوز) : د خیبر پښتونخوا په لکي مروت کې پولیسو پر وخت عملیاتو له لارې د ترهګرۍ یوه لویه هڅه شنډه کړې، له چاودېدونکو توکو ډک مزدَه موټر یې نیولی او د ډزو په تبادله کې یې یو شکمن ځانمرګی بریدګر وژلی دی.
د پولیسو په وینا، پېښه د براګي پولیس تاڼې په حدودو کې رامنځته شوې ده. د پولیسو د امن کمېټې غړو ته د پېښې د معلوماتو له رسېدو سره سم د سیمې ټولې د ننوتلو او وتلو لارې تړل شوې او امنیتي تدابیر سخت کړل شول.
بل لور ته، د لکي مروت د پولیسو مشر سجاد احمد صاحبزاده په مشرۍ د پولیسو درنه ډله د پېښې ځای ته ولېږل شوه. د عملیاتو پر مهال له چاودېدونکو توکو ډک مزدَه موټر د پولیسو لاس ته ورغی، په داسې حال کې چې د ډزو په تبادله کې یو شکمن ځانمرګی بریدګر ووژل شو.
د لومړنیو معلوماتو له مخې، په موټر کې په ډرمونو کې د چاودېدونکو توکو زیاته اندازه ځای پر ځای شوي وو.
پولیسو له مخکې د ترهګریز پلان په اړه معلومات ترلاسه کړي وو
د پولیسو د سرچینو په وینا، له څه مودې راهیسې لکي مروت پولیسو ته داسې معلومات رسېدل چې وسلهوالو د مزدَه موټر له لارې د پراخې ورانۍ لپاره له چاودېدونکو توکو ډک موټر او ځای پر ځای کېدونکې چاودېدونکې وسیله چمتو کړې ده.
د دغو معلوماتو پر بنسټ پولیسو په سیمه کې خپل عملیات زیات کړي وو، ګزمې یې پراخې کړې وې او په بېلابېلو ځایونو کې یې د پلټنې پوستې هم زیاتې کړې وې. د پولیسو په وینا، نن د براګي پولیس تاڼې په حدودو کې د یاد مشکوک موټر د موجودیت له معلومېدو سره سم سیمهییزو پولیسو سمدستي اقدام وکړ.
د پولیسو د عملیاتو پر مهال د ډزو تبادله وشوه، چې په پایله کې یو مشکوک ځانمرګی بریدګر ووژل شو او له چاودېدونکو توکو ډک موټر د پولیسو ولکې ته ورغی.
د ترهګرۍ ضد څانګې او بم شنډولو ډلې سیمې ته ورسېدې
د پېښې له خبر ترلاسه کېدو وروسته د لکي مروت د پولیسو مشر سجاد احمد صاحبزاده په مشرۍ د ترهګرۍ ضد څانګې، سیمهییزو پولیسو او د چټک غبرګون ځواک سرتېري د پېښې ځای ته ورسېدل. امنیتي ځواکونو په سیمه کې پراخې پلټنې پیل کړې او د بمونو شنډولو ډلې هم ځای ته ورسېدې.
د لومړنیو معلوماتو له مخې، په موټر کې په ډرمونو کې زیاته اندازه چاودېدونکي توکي ځای پر ځای شوي وو، چې د شنډولو لپاره یې اړین اقدامات روان دي.
د وژل شوي کس د پېژندنې په اړه پلټنې روانې دي
د پولیسو د سرچینو په وینا، شک کېږي چې وژل شوی مشکوک ځانمرګی بریدګر د افغانستان تبعه وي، خو د هغه د هویت او نورو معلوماتو د تثبیت لپاره پلټنې روانې دي. چارواکو تر اوسه د هغه هویت په رسمي ډول نه دی تایید کړی.
د خیبر پښتونخوا د پولیسو د مشر د لکي مروت پولیسو ستاینه
بل لور ته، د خیبر پښتونخوا د پولیسو عمومي مشر ذوالفقار حمید د لکي مروت د پولیسو هغه اقدام ستایلی چې په پر وخت عملیاتو سره یې د ترهګرۍ یوه لویه هڅه شنډه کړې ده.
نوموړي په خپل بیان کې ویلي چې د فتنهالخوارج ناوړه موخې یې له خاورو سره خاورې کړې او د پولیسو زړورو سرتېرو د لسګونو ارزښتناکو انسانانو ژوند ژغورلی دی.
هغه زیاته کړې چې د خیبر پښتونخوا پولیس د خلکو د ساتنې لپاره په مېړانه مبارزه کوي او د ترهګرو پر ضد به خپلې هڅې روانې ساتي. د پولیسو عمومي مشر ټینګار کړی چې پولیس ځواک به د خلکو د سر او مال د خوندیتوب لپاره د ترهګرۍ پر ضد مبارزې ته دوام ورکړي.


غلام اکبر مروت