اسلام اباد (شال نیوز) : د پاکستان د ټیلي کمیونیکېشن ادارې (پي ټي اې) ویلي چې د هېواد له سمندري ساحل څخه شاوخوا ۱۱ کیلومتره لرې د انټرنېټ په یوه نړیوال کېبل کې خرابي پیدا شوې ده، چې له امله یې په پاکستان کې د انټرنېټ خدمات اغېزمنېدای شي.
پي ټي اې خبرداری ورکړی چې د دې خرابۍ له امله ځینې کاروونکي د انټرنېټ د رفتار له کمېدو او د اړیکو له پرلهپسې پرې کېدو سره مخ کېدای شي. ادارې ویلي چې د ستونزې د هواري لپاره له اړوندو ادارو سره په تماس کې ده او هڅې روانې دي چې د انټرنېټ خدمات بېرته عادي حالت ته راوګرځول شي.
پي ټي اې تر اوسه دا نه دي ویلي چې په کېبل کې خرابي د څه له امله پیدا شوې، د پاکستان کومې سیمې به تر ټولو زیاتې اغېزمنې شي او د ترمیم کار به څومره وخت ونیسي.
پاکستان د سمندر لاندې د څو نړیوالو کېبلونو له لارې د نړۍ له انټرنېټي شبکې سره تړلی دی. د دغو کېبلونو له لارې د هېواد د انټرنېټ د معلوماتو لویه برخه نورو هېوادونو ته لېږدول کېږي او له هغه ځایه پاکستان ته رارسېږي.
د دغو کېبلونو خرابېدل د انټرنېټ پر رفتار، نړیوالو وېبپاڼو ته پر لاسرسي، ویډیويي اړیکو، انلاین کاروبارونو او نورو انټرنېټي خدماتو اغېز کولای شي. خو د یوه کېبل خرابېدل په دې معنا نه دي چې په ټول پاکستان کې به انټرنېټ بند شي، ځکه هېواد له نړیوالې شبکې سره نورې اړیکې هم لري.
پي ټي اې تر اوسه د خرابۍ د ترمیم لپاره کومه ټاکلې نېټه نه ده اعلان کړې او دا یې هم نه دي ویلي چې د انټرنېټ خدمات تر کومې اندازې اغېزمن شوي دي.


شال نیوز