هنګو (شال نیوز) : د هنګو سټي پولیسو ویلي چې د بجلي له ټرانسفارمرونو د کوایلو او نورو قیمتي سامانونو د غلا په تور یې څلور کسان نیولي او له هغوی څخه یې غلا شوی سامان ترلاسه کړی دی.
د هنګو سټي تاڼې اېس اېچ او محمود عالم خټک ویلي چې نیول شوي کسان په پنځو بېلابېلو مقدمو کې پولیسو ته مطلوب وو او د ضلعې په یو شمېر سیمو کې د بجلي له ټرانسفارمرونو د سامان په غلا کولو تورن دي.
د نوموړي په وینا، پولیسو د دغو غلاوو په اړه له پلټنو وروسته عملیات کړي او عزیز، ظاهرالله، اسد او اجمعین نومي څلور کسان یې نیولي دي.
محمود عالم خټک ویلي چې پر نیول شوو کسانو تور دی چې د هنګو په لختي بانډه، دروزي پلوسه، پټ بازار، وچ بازار او شنوړي سیمو کې یې د بجلي له ټرانسفارمرونو کوایل او نور قیمتي سامان غلا کړی و.
پولیس وايي، د عملیاتو پر مهال یې له نیول شوو کسانو څخه غلا شوي کوایل او نور سامان هم ترلاسه کړی دی، خو د ترلاسه شوي سامان د اندازې او ارزښت په اړه یې معلومات نه دي ورکړي.
د بجلي د ټرانسفارمرونو کوایل د هغو مهمې پرزې دي چې د بجلي په لېږد او د ولټیج په بدلولو کې کار کوي. د دغو پرزو غلا کېدل ټرانسفارمر له کاره غورځولی شي او د اړوندې سیمې د بجلي رسولو نظام اغېزمنولی شي.
په ټرانسفارمرونو کې د مسو کوایل کارول کېږي چې په بازار کې مالي ارزښت لري. د دغو کوایلو د غلا له امله د ټرانسفارمرونو ترمیم او بېرته فعالول هم لګښت غواړي.
خو پولیسو تر اوسه نه دي ویلي چې په یادو سیمو کې د دغو غلاوو له امله څومره ټرانسفارمرونه خراب شوي، څومره مالي زیان اوښتی او یا د څو کورونو او دوکانونو بجلي پرې شوې وه.
اېس اېچ او محمود عالم خټک ویلي چې له نیول شوو کسانو نورې پلټنې روانې دي او پولیس تمه لري چې د پلټنو پر مهال به د غلاوو په اړه نور معلومات هم ترلاسه کړي. پولیسو دا هم نه دي څرګنده کړې چې ایا په دغو پېښو کې نور کسان هم لاس لري او که نه.
تر اوسه د نیول شوو کسانو یا د هغوی د وکیلانو دریځ نه دی ترلاسه شوی. پر دغو څلورو کسانو لګېدلي تورونه لا په عدالت کې نه دي ثابت شوي.


شال نیوز