سري نګر (شال نیوز) : د هند تر واک لاندې کشمیر کې امنیتي ځواکونو د لشکر طیبه وسله والې ډلې یو قوماندان محمد لطیف بټ د عملیاتو پر مهال وژلی دی. د هند پوځ او د جمو او کشمیر پولیسو ویلي چې ۲۲ کلن لطیف بټ د چهارشنبې په ورځ، د نومبر په ۱۸مه، د کولګام ضلعې په زنګلپوره سیمه کې د امنیتي ځواکونو سره په نښته کې وژل شوی دی.
د هندي چارواکو په وینا، د پوځ د نهم راشټریه رائفلز ځواک او پولیسو د استخباراتي معلوماتو پر اساس په سیمه کې ګډ عملیات پیل کړي وو. پولیس وايي، لطیف بټ په یوه جومات کې پټ شوی و او امنیتي ځواکونو څو ځله ترې غوښتي وو چې وسله کېږدي او ځان تسلیم کړي.
د کولګام د پولیسو مشر عنایت علي چوهدري او د پوځ یوه قوماندان له نوموړي سره د ویډیويي اړیکې له لارې هم خبرې کړې وې. چارواکي وايي، هغوی لطیف بټ ته ویلي وو چې عمر یې کم دی او باید ځان تسلیم کړي، خو نوموړي د هغوی غوښتنه نه وه منلې.
د هند پوځ ادعا کوي چې لطیف بټ د شپې شاوخوا دوه بجې او ۴۵ دقیقې له جومات څخه پر امنیتي ځواکونو ډزې پیل کړې وې. د پوځ په وینا، ځواکونو یې د جومات د خوندي ساتلو لپاره له احتیاطه کار اخیستی او لطیف بټ یې له جومات څخه تر راوتلو وروسته وژلی دی. د دغو څرګندونو خپلواک پخلی نه دی شوی.
د هندي پولیسو د معلوماتو له مخې، لطیف بټ د کولګام ضلعې د اشموجي سیمې د خریوان چادر اوسېدونکی و. هغه پخوا د ترکاڼۍ کار کاوه او خپلې زده کړې یې نیمګړې پرېښې وې. پولیس وايي، نوموړی د ۲۰۲۵ کال په نومبر کې له لشکر طیبه سره یوځای شوی و او د نیولو لپاره یې ۱۵ لکه هندي روپۍ انعام ټاکل شوی و.
هندي امنیتي ادارې پر لطیف بټ تور لګوي چې د نومبر په ۱۱مه یې د کولګام په اکران سیمه کې د مرکزي ریزرو پولیسو پر یوې پوستې په برید کې لاس درلود. په دغه برید کې درې امنیتي سرتېري ژوبل شوي وو. پولیس نوموړی د روان کال په جولای کې په اننت ناګ کې د یوه پولیس او په کولګام کې د دوو مزدورانو د وژنې په پېښو کې هم تورن بولي.
د هندي چارواکو په وینا، د لطیف بټ یو ملګری عمر نثار ډار هم د نومبر په ۱۶مه د کولګام په لارو سیمه کې د امنیتي ځواکونو په عملیاتو کې وژل شوی و. هندي امنیتي چارواکو د لطیف بټ له وژل کېدو وروسته ادعا کړې چې په جنوبي کشمیر کې نور ځایي فعال وسله وال نه دي پاتې.
خو د دې ادعا خپلواک پخلی نه دی شوی او تر اوسه لشکر طیبه هم د لطیف بټ د وژل کېدو په اړه څه نه دي ویلي. هندي چارواکي وايي، په زنګلپوره او شاوخوا سیمو کې د امنیتي ځواکونو پلټنې لا هم روانې دي.


شال نیوز