اسلام اباد (شال نیوز) : د پاکستان پخواني لومړي وزیر عمران خان، چې د راولپنډۍ په اډیاله زندان کې بندي دی، ویلي چې روغتیايي حالت یې خراب شوی او ډاکټرانو ورته د مغزي سکتې او زړه د حملې د خطر خبرداری ورکړی دی.

 

عمران خان د نومبر په ۱۶مه د پاکستان قضايي نظام ته په یوه پرانیستي لیک کې شکایت کړی چې د زندان چارواکي د محکمو حکمونه نه عملي کوي، له خپلې کورنۍ سره یې لیدنې محدودې کړې او د ده او مېرمنې روغتیايي ستونزو ته پوره پام نه کېږي.

 

دغه لیک چې د عمران خان پر رسمي فېسبوک پاڼه خپور شوی، د هغه د وکیل له لارې قضايي چارواکو ته استول شوی دی. عمران خان په لیک کې ویلي چې د وینې فشار یې په وروستیو کې تر ۱۹۳ پورې لوړ شوی او ډاکټرانو ورته خبرداری ورکړی چې د اوسني وضعیت دوام یې د مغزي سکتې او زړه د حملې له خطر سره مخ کولی شي.

 

نوموړي ادعا کړې چې د ورځې تر ۲۲ ساعتونو پورې په انفرادي بند کې ساتل کېږي او له خپلې کورنۍ، وکیلانو، کتابونو او ټلوېزیون سره یې اړیکې او لاسرسی محدود شوی دی. د هغه په وینا، د زندان چارواکي یې له خپلې مېرمنې بشریٰ بي بي سره اوونیزې لیدنې په پرله پسې توګه لغوه کوي او له خپلو دوو زامنو، قاسم او سلیمان، سره د ټیلیفون له لارې د خبرو اجازه هم نه ورکوي.

 

عمران خان ویلي چې د زندان طبي بورډ د هغه رواني فشار او اضطراب ثبت کړی او سپارښتنه یې کړې چې له کورنۍ سره دې د لیدنو اجازه زیاته شي او کتابونو او ټلوېزیون ته دې لاسرسی ورکړل شي. خو نوموړي شکایت کړی چې د طبي بورډ دغه سپارښتنې تر اوسه نه دي عملي شوې.

 

پخواني لومړي وزیر د خپلو سترګو د لید په اړه هم اندېښنه څرګنده کړې ده. هغه ادعا کړې چې د روان کال په فبرورۍ کې یې وکیل د لیدنې پر مهال خبر شو چې د ښي سترګې شاوخوا ۸۵ سلنه لید یې له لاسه ورکړی دی. عمران خان په خپل لیک کې د خپلې مېرمنې بشریٰ بي بي روغتیايي حالت هم د اندېښنې وړ بللی دی.

 

د هغه په وینا، مېرمنې یې د روان کال په اپرېل کې د سترګې د شبکیې د جلا کېدو له امله پېچلي عملیات کړي وو، خو له عملیاتو وروسته بېرته انفرادي بند ته لېږدول شوې ده. نوموړي ویلي چې بشریٰ بي بي اوس هم د سترګو له جدي ستونزو سره مخ ده، رڼا نه شي زغملی او که پر وخت یې بله جراحي ونه شي، د تل لپاره د لید له لاسه ورکولو خطر ورسره شته.

 

عمران خان له قضايي چارواکو غوښتي چې د سترې محکمې حکمونه عملي کړي، د ده او مېرمنې لپاره د مناسبې طبي درملنې انتظام وکړي او له کورنۍ او وکیلانو سره یې د لیدنو په وړاندې موجود خنډونه لرې کړي.

 

هغه ټینګار کړی چې له محکمو کوم ځانګړی امتیاز نه غواړي، بلکې یوازې د هغو قانوني حقونو غوښتنه کوي چې د پاکستان قانون او د محکمو پرېکړې یې ورته ورکوي. پخواني لومړي وزیر ویلي چې د خپل سیاسي ژوند پر مهال له ګڼو قضايي مقدمو سره مخ شوی او اوس هم غواړي په محکمو کې خپله بې ګناهي ثابته کړي.

 

د هغه په خبره، د زندان اوسني شرایط او روغتیايي ستونزې یې ژوند له خطر سره مخ کوي او قضايي چارواکي باید د وضعیت د لا خرابېدو مخه ونیسي. د عمران خان د دغو ادعاوو په اړه د زندان د چارواکو او اړوندو حکومتي ادارو تازه دریځ په ورکړل شویو معلوماتو کې نه دی څرګند شوی. د هغه د روغتیايي حالت او د طبي بورډ د سپارښتنو خپلواک تایید هم نه دی شوی.