اسلام‌اباد (شال نیوز) : د پاکستان صدر آصف علي زرداري ویلي چې په انټرنېټ او ټولنیزو رسنیو کې د کرکې ډکې خبرې د ټولنې سولې، زغم او یووالي ته جدي خطر پېښوي او د خلکو ترمنځ بې باوري او اختلافات زیاتولی شي.

 

صدر زرداري د نومبر په ۱۶مه د زغم د نړیوالې ورځې په مناسبت په خپل پیغام کې د مختلفو مذهبونو، کلتورونو او نظرونو ترمنځ د درناوي او سوله‌ییز ګډ ژوند پر اهمیت ټینګار کړی دی.

 

نوموړي ویلي چې په ډیجیټل نړۍ کې د کرکې خپرېدل د ټولنې لپاره یوه جدي ستونزه ده او د دې مخنیوي لپاره د زغم او یو بل ته د درناوي دود پیاوړی کول ضروري دي.

 

صدر زرداري په خپل پیغام کې د دې خبرې اهمیت یاد کړی چې خلک باید د نظر د اختلاف باوجود د یو بل درناوی وکړي او اختلافات د خبرو اترو او تفاهم له لارې حل کړي.

 

په پاکستان کې په وروستیو کلونو کې ټولنیزې رسنۍ د سیاسي بحثونو، مذهبي اختلافاتو او د ټولنیزو مسئلو په اړه د نظر څرګندولو په مهم ډګر بدلې شوې دي. خو له دې سره په انلاین بحثونو کې د سپکاوي، شخصي بریدونو او د کرکې د خپرېدو په اړه هم اندېښنې موجودې دي.

 

د ټولنیزو رسنیو له لارې خپرېدونکې کرکجنې خبرې یوازې تر انټرنېټ پورې نه محدودېږي، بلکې د خلکو پر خپلمنځي اړیکو او په ټولنه کې پر زغم هم اغېز کولی شي.

 

د زغم نړیواله ورځ هر کال د نومبر په ۱۶مه نمانځل کېږي. د ملګرو ملتونو د ښوونې، ساینس او کلتور ادارې، یونیسکو، په ۱۹۹۵ کال کې د زغم د اصولو اعلامیه منظور کړې وه او ملګرو ملتونو په ۱۹۹۶ کال کې د نومبر ۱۶مه د زغم نړیواله ورځ وبلله.

 

د دې ورځې موخه د مختلفو مذهبونو، ژبو، قومونو او کلتورونو ترمنځ د درناوي، تفاهم او سوله‌ییز ګډ ژوند هڅول دي. د یونیسکو د اصولو له مخې، زغم یوازې د نورو د نظرونو منل نه دي، بلکې د انسانانو د حقونو، ازادیو او توپیرونو درناوی هم پکې شامل دی.

 

په پاکستان کې د زغم د نړیوالې ورځې په مناسبت د صدر زرداري دا پیغام په داسې وخت کې خپور شوی چې د ټولنیزو رسنیو د کارولو، د بیان د ازادۍ او د انلاین کرکې د مخنیوي په اړه بحثونه روان دي.

 

د دې بحثونو یوه مهمه پوښتنه دا ده چې څنګه د کرکې د خپرېدو مخه ونیول شي او په عین وخت کې د خلکو د نظر څرګندولو حق هم خوندي پاتې شي.