پلخمري (شال نیوز) : د افغانستان په بغلان ولایت کې د نباتاتي تېلو د جوړولو شاوخوا ۷۰ تر ۸۰ پورې وړې کارخانې فعالې دي، چې نږدې زر کسان پکې کار کوي.
په بغلان کې د تېلو جوړولو د کارخانو د اتحادیې مشر محمد یار انصاري باختر خبري اژانس ته ویلي چې په دغو کارخانو کې د زغرو، کنجدو، شړشمو، کلونجۍ او یو شمېر نورو نباتاتو څخه خالص تېل جوړېږي او بیا بازارونو ته وړاندې کېږي.
د هغه په وینا، په بغلان کې جوړېدونکي نباتاتي تېل د ښه خوند او معیار له امله په بازارونو کې شهرت لري او د بهرنیو وارداتي تېلو په پرتله په ارزانه بیه خرڅېږي.
د تېلو جوړولو د یوې کارخانې مالک حاجي صلاح الدین ویلي چې په دغو کارخانو کې هره ورځ زرګونه لیټره نباتاتي تېل تولیدېږي او د خرڅلاو لپاره بازارونو ته رسول کېږي.
نوموړي ویلي چې د دغو کارخانو فعالیت نه یوازې سلګونو کسانو ته د روزګار موقعې برابرې کړې، بلکې له بهرنیو هېوادونو څخه د تېلو پر واردولو د افغانستان د تکیې په کمولو کې هم مرسته کوي.
بلخوا د بغلان یو شمېر اوسېدونکو د کورنیو تولیداتو پر ملاتړ ټینګار کړی او ویلي یې دي چې د افغانستان د صنعتونو د ودې او د هېواد د اقتصاد د پیاوړتیا لپاره باید خلک کورني تولیدات وکاروي.
دوی وايي، د بهرنیو وارداتي تېلو د جوړولو د طریقې او په هغو کې د کارېدونکو موادو په اړه پوره معلومات نه لري، نو ځکه په خپلو سیمو کې جوړېدونکي نباتاتي تېل غوره ګڼي.
د باختر خبري اژانس د راپور له مخې، په بغلان کې د نباتاتي تېلو د تولید د دغو کارخانو فعالیت د کورني صنعت د ودې او د خلکو لپاره د روزګار د موقعو د زیاتېدو یوه برخه بلل کېږي.
خو په راپور کې د دغو کارخانو د ټولې پانګونې، کلني تولید او د تولید شوو تېلو د معیار د خپلواکو ازموینو په اړه معلومات نه دي ورکړل شوي.


شال نیوز