واشنګټن (شال نیوز) : د امریکا سپینې ماڼۍ اعلان کړی چې ولسمشر ډونالډ ټرمپ به د نومبر په ۱۹مه د چین په شنژن ښار کې د روسیې له ولسمشر ولادیمیر پوتین او د چین له ولسمشر شي جین پینګ سره درې اړخیزه غونډه وکړي.

 

د سپینې ماڼۍ په وینا، په دې غونډه کې به د اټومي وسلو د کمولو او د ایران د جګړې په اړه خبرې کېږي، خو امریکا تمه نه لري چې درې واړه هېوادونه دې په لومړۍ ناسته کې کومې هوکړې ته ورسېږي.

 

سپینې ماڼۍ د نومبر په ۱۳مه ویلي چې دا غونډه به د اسیا او ارام سمندر د اقتصادي همکاریو سازمان، اپک، د سرمشریزې په څنډه کې ترسره شي. ټاکل شوې دغه سرمشریزه د نومبر په ۱۸مه او ۱۹مه په شنژن ښار کې جوړه شي.

 

د اسوشیټېډ پرېس خبري اژانس د راپور له مخې، دا به لومړی ځل وي چې د امریکا، روسیې او چین مشران په یوه ګډه درې اړخیزه غونډه کې برخه اخلي. د سپینې ماڼۍ مرستیالې ویاندې اولیویا وېلز خبریالانو ته ویلي چې ټرمپ غواړي د نورو موضوعاتو ترڅنګ په نړۍ کې د اټومي وسلو د شمېر کمولو په اړه هم خبرې وکړي.

 

د هغې په وینا، ټرمپ په دې باور دی چې د اټومي وسلو زیاتېدل او نورو هېوادونو ته یې خپرېدل د نړۍ امنیت ته جدي خطر پېښوي. د امریکا یوه جګپوړي چارواکي، چې د نوم نه ښودلو په شرط یې له خبریالانو سره خبرې کړې، ویلي چې واشنګټن له دې غونډې څخه د کومې هوکړې تمه نه لري.

 

دغه چارواکي ویلي چې دا ناسته به د درې واړو هېوادونو د مشرانو ترمنځ د اټومي وسلو د محدودولو په اړه د خبرو د پیل لپاره یو فرصت وي. دا غونډه په داسې وخت کې کېږي چې د امریکا او روسیې ترمنځ د اټومي وسلو د محدودولو وروستۍ هوکړه، چې د نوي سټارټ په نوم یادېده، د روان کال په فبرورۍ کې پای ته رسېدلې ده.

 

د دې تړون له پای ته رسېدو وروسته د امریکا او روسیې پر هغو اټومي وسلو محدودیتونه نور نشته چې د تړون له مخې پرې لګول شوي وو. د امریکا د دفاع وزارت د اټکل له مخې، چین له ۶۰۰ څخه زیاتې اټومي سرګلولې لري، په داسې حال کې چې امریکا او روسیه هر یو له ۵۰۰۰ څخه زیاتې اټومي سرګلولې لري.

 

واشنګټن غواړي چې چین هم د اټومي وسلو د محدودولو په راتلونکې هوکړه کې شامل شي، خو چین تر اوسه په دې اړه د خبرو لپاره لېوالتیا نه ده ښودلې. امریکايي چارواکو ویلي چې ټرمپ به په درې اړخیزه غونډه کې د ایران د جګړې موضوع هم راپورته کړي.

 

د دوی په وینا، د اوکراین جګړه د دې غونډې په پلان شوې اجنډا کې نه ده شامله، ځکه امریکا او روسیه د دې جګړې د پای ته رسولو لپاره جلا خبرې کوي او چین د دغو خبرو برخه نه دی.

 

ټاکل شوې چې ټرمپ د نومبر په ۱۹مه لومړی د چین له ولسمشر شي جین پینګ سره جلا لیدنه او کاري غرمنۍ ولري او وروسته له هغه او پوتین سره په ګډه غونډه کې برخه واخلي. سپینې ماڼۍ ویلي چې له پوتین سره د ټرمپ د جلا لیدنې کوم پلان نه دی جوړ شوی.

 

د روسیې چارواکو هم تر دې مخکې د درې واړو مشرانو ترمنځ د احتمالي غونډې د چمتووالي خبره کړې وه. د امریکا، روسیې او چین دا غونډه په داسې وخت کې پلان شوې چې د اټومي وسلو د کنټرول په اړه نړیوالې اندېښنې زیاتې شوې دي او د ایران او اوکراین جګړو د دغو هېوادونو ترمنځ اړیکې نورې هم پېچلې کړې دي.

 

که څه هم امریکايي چارواکي له دې غونډې څخه د سمدستي هوکړې تمه نه لري، خو د درې واړو هېوادونو د مشرانو ترمنځ مستقیمې خبرې د اټومي وسلو د محدودولو لپاره د راتلونکو مذاکراتو لار پرانیستلی شي.