مستونګ (شال نیوز) : د بلوچستان په مستونګ ضلعه کې د امنیتي ځواکونو پر یوې پوستې د بارودو ډک موټر په برید کې دوه ولسي کسان وژل شوي او د فرنټیر کور د درېیو عسکرو په ګډون لږ تر لږه ۱۶ کسان ژوبل شوي دي. پولیس وايي، د برید په ځواب کې درې وسله وال هم وژل شوي دي.

 

دا پېښه د پنجشنبې په ورځ، د نومبر په ۱۲مه، د مستونګ ښار شاوخوا لس کیلومتره لرې د کوټې او کراچۍ پر لویه لاره، اېن ۲۵، د کنډوا امنیتي پوستې ته نږدې شوې ده.

 

د بلوچستان پولیسو په یوه بیان کې ویلي چې وسله والو غوښتل له بارودو ډک موټر د فرنټیر کور له پوستې سره وجنګوي، خو امنیتي ځواکونو یې مخه ونیوله او په ځوابي ډزو کې یې درې بریدګر ووژل.

 

د پولیسو په وینا، په چاودنه کې دوه ولسي کسان، کلیم الله د عبدالله زوی او بي بي لایبه د دل مراد لور، وژل شوي دي. پولیس وايي، په ژوبلو کسانو کې ۱۳ ولسي وګړي او د فرنټیر کور درې عسکر شامل دي. په ولسي ژوبلو کې ښځې او ماشومان هم شته.

 

د ژوبلو کسانو له ډلې یو درې کلن ماشوم محمد سنان، ۱۲ کلنه شاهلیزه او یو شمېر نورې ښځې یادې شوې دي. چارواکي وايي، د چاودنې زور دومره زیات و چې نږدې کورونو او یوه جومات ته یې هم زیان رسولی دی. یوه حکومتي چارواکي عرب نیوز ته ویلي چې پنځه کورونه ویجاړ شوي دي.

 

ټول ژوبل کسان د علاج لپاره روغتونونو ته رسول شوي، خو د هغوی د روغتیايي حالت په اړه بشپړ معلومات نه دي ورکړل شوي. د بلوڅ بېلتون غوښتونکې وسله والې ډلې، بلوچستان لېبرېشن آرمي یا بي اېل اې، د برید ذمه واري منلې ده. خو د دې ډلې د ادعا او د امنیتي ځواکونو د ورکړل شوو معلوماتو خپلواکه تایید نه دی شوی.

 

د بلوچستان اعلا وزیر میر سرفراز بګټي برید غندلی او د وژل شوو کسانو له کورنیو سره یې خواخوږي څرګنده کړې ده. نوموړي ویلي چې حکومت به د خلکو د سر او مال د ساتنې لپاره امنیتي اقدامات جاري ساتي.

 

د مرګ ژوبلې په اړه په راپورونو کې لږ توپیر شته. د بلوچستان پولیسو د ۱۶ ژوبلو کسانو معلومات ورکړي، خو عرب نیوز د یوه حکومتي چارواکي له قوله د ژوبلو شمېر ۱۷ ښودلی دی.

 

مستونګ د بلوچستان له هغو ضلعو څخه ده چې په وروستیو کلونو کې پکې پر امنیتي ځواکونو او ولسي وګړو وسله وال بریدونه شوي دي. په دې ضلعه کې د روانې میاشتې له دې برید مخکې هم د وسله والو پر ضد عملیات شوي وو.