هرات (شال نیوز) : په هرات ولایت کې د کرنیزو محصولاتو او کورنیو تولیداتو درې ورځنی نندارتون د تولیدوونکو او سوداګریزو شرکتونو په ګډون پرانیستل شو چې موخه یې د کورنیو تولیداتو ملاتړ، د بازارموندنې پراختیا، د پلور زیاتوالی او د پانګونې راجلبول دي.
په دغه نندارتون کې ۱۰۰ غرفې جوړې شوې چې د بېلابېلو تولیدي شرکتونو او بنسټونو کرنیز او کورني محصولات پکې نندارې ته وړاندې شوي دي.
د نندارتون جوړوونکي وايي، د دغه نوښت له لارې هڅه کوي چې کورنیو تولیدوونکو ته د خپلو محصولاتو د معرفۍ او پلور زمینه برابره کړي، د پانګوالو پام د هېواد کورني تولید ته راواړوي او د خصوصي سکټور د فعالیتونو د پراختیا لپاره نوي فرصتونه رامنځته کړي.
د دوی په وینا، دا ډول نندارتونونه کولای شي د تولیدوونکو او پېرودونکو ترمنځ اړیکې پیاوړې کړي، کورني محصولات بازار ته وروپېژني او د تولیدوونکو لپاره د سوداګریزو همکاریو زمینه برابره کړي.
هرات د افغانستان له مهمو سوداګریزو او اقتصادي ولایتونو څخه دی او د کرنې، صنعت او سوداګرۍ په برخو کې د پام وړ ظرفیتونه لري. د کورنیو تولیداتو لپاره د بازار موندنې او پانګونې راجلبول د دې ولایت د اقتصادي فعالیتونو په پراختیا کې مهم بلل کېږي.
تمه ده چې دغه درې ورځنی نندارتون به د کورنیو تولیداتو د پېژندنې، د تولیدوونکو د پلور د زیاتوالي او د خصوصي سکټور د سوداګریزو اړیکو د پیاوړتیا لپاره اغېزمن فرصت برابر کړي.


شال نیوز