بنو (شال نیوز) : په بنو کې د اېډوائزري کونسل غړي او اېډوائزر ملک احسان الله خان وزیر د خلیفه ګل نواز هسپتال ناڅاپي دوره کړې او د ایمرجنسي وارډ پر خراب حالت یې سخته ناخوښي څرګنده کړې ده.
ملک احسان الله خان وزیر له یوې رسنیزې ډلې سره د هسپتال بېلابېلې څانګې وکتلې. د دورې پر مهال یې ولیدل چې په ایمرجنسي وارډ کې په یو بېډ درې مریضان پراته وو او څلورم مریض د بېډ خالي کېدو ته انتظار کاوه.
په دغه وارډ کې د ځای د کموالي له امله ښځینه مریضانو ته هم د نارینه وو په وارډ کې ډرېپونه لګول کېدل. ملک احسان الله خان وزیر د دې حالت په لیدو سخته غوسه څرګنده کړه او له موجودو انتظامي او طبي کارکوونکو یې وضاحت وغوښت.
د هسپتال کارکوونکو نوموړي ته وویل چې د مریضانو د زیات شمېر په مقابل کې بېډونه، ډاکټران او نور طبي کارکوونکي کم دي او موجودې اسانتیاوې د ټولو مریضانو د اړتیاوو پوره کولو لپاره بسنه نه کوي.
د هسپتال د انتظامیې په وینا، د ډاکټرانو لپاره د استوګنې مناسب انتظام نشته، چې له امله یې ګڼ ډاکټران بنو ته د دندې لپاره نه راځي. د طبي کارکوونکو کموالی د عملیاتو په څانګه کې هم ستونزې پیدا کوي.
انتظامیې وویل چې د هسپتال د پاتې ودانۍ د جوړولو چارې که بشپړې شي، نو د بېډونو او نورو طبي اسانتیاوو د کموالي ستونزه به تر یوه حده کمه شي.
د هسپتال چارواکو دا هم وویل چې د خپلو موجودو وسایلو په مرسته یې د زړه د ناروغانو لپاره کېت لېب بشپړ کړی دی، چې له امله به یې ناروغان د زړه د ځینو معایناتو او درملنې لپاره پېښور ته له تګ څخه خلاص شي. دوی زیاته کړه چې د انسټیټیوشنل بېسډ پریکټس له لارې هم زرګونو مریضانو ته د علاج اسانتیاوې برابروي.
له دې وروسته ملک احسان الله خان وزیر د هسپتال له میډیکل ډایرېکټر سره د هغه په دفتر کې ولیدل او د هسپتال د انتظامي ستونزو، د طبي کارکوونکو د کموالي او مریضانو ته د علاج د اسانتیاوو په اړه یې خبرې وکړې.
نوموړي وویل چې خلکو ته د صحت اسانتیاوې برابرول د حکومت بنیادي ذمه واري ده او هر مریض حق لري چې په مناسب ماحول کې یې علاج وشي.
هغه زیاته کړه چې په هسپتال کې د بېډونو، ډاکټرانو، طبي کارکوونکو او نورو ضروري وسایلو د کموالي مسئلې به له اړوندو چارواکو سره شریکې کړي، څو د بنو او شاوخوا سیمو خلکو ته د علاج غوره اسانتیاوې برابرې شي.
د خلیفه ګل نواز هسپتال انتظامیې د موجودو ستونزو لوی لامل د مریضانو زیات شمېر، د کارکوونکو کموالی او محدودې مالي او طبي اسانتیاوې بللې دي.


شال نیوز