اسلام‌اباد (شال نیوز) : د پاکستان د اپوزېشن ګوندونو اتحاد، تحریک تحفظ آیین پاکستان، له حکومت څخه غوښتنه کړې چې په ازاد کشمیر کې له احتجاج کوونکو سره خبرې بېرته پیل کړي او د هغوی د غوښتنو د حل لپاره عملي ګامونه واخلي.

 

د اتحاد ویاند حسین احمد یوسفزي ویلي چې د اپوزېشن یو پلاوی ازاد کشمیر ته روان و، خو امنیتي چارواکو په کهوټه کې ودراوه او د سفر د دوام اجازه یې ورنه کړه. د نوموړي په وینا، د پلاوي د سفر مقصد له احتجاج کوونکو سره لیدل، د هغوی د ستونزو اورېدل او په سیمه کې د موجوده حالاتو معلومول وو.

 

حسین احمد یوسفزي ویلي چې د سیاسي اختلافونو د هواري لپاره خبرې اترې ضروري دي او حکومت باید د احتجاج کوونکو غوښتنې واوري. د اپوزېشن اتحاد له حکومت څخه دا غوښتنه هم کړې چې د احتجاجونو پر مهال د زور استعمال په اړه د لګېدلو تورونو بې‌طرفه پلټنې وکړي او نیول شوو کسانو ته د قانون له مخې خپل حقونه ورکړي.

 

اتحاد ټینګار کړی چې د خلکو د ستونزو د حل لپاره باید د خبرو لاره پرانستې وساتل شي. تر اوسه د پلاوي د درولو د علت په اړه د حکومتي چارواکو دریځ نه دی ترلاسه شوی. دا هم نه ده څرګنده چې له احتجاج کوونکو سره د خبرو د بیا پیل لپاره کومه نوې نېټه ټاکل شوې ده.