کوټه (شال نیوز) : د پاکستان د خبریالانو د وفاقي اتحادیې په غوښتنه، د بلوچستان د خبریالانو اتحادیې په کوټه او د بلوچستان په نورو سیمو کې توره ورځ ولمانځله او د خبریالانو د حقونو، د بیان د ازادۍ او د هغوی د اقتصادي خوندیتوب لپاره یې احتجاجونه وکړل.

 

احتجاج کوونکو خبریالانو پر لاسونو تورې پټۍ تړلې وې او د پرېس کلبونو پر ودانیو یې تور بیرغونه پورته کړي وو. د احتجاج ګډونوالو په رسنیو کې له دندو د خبریالانو پر لرې کولو، د برېښنايي جرمونو د مخنیوي قانون (پیکا) له مخې پر نیونو، د رسنیو پر ازادۍ پر محدودیتونو او د خبریالانو پر زیاتېدونکو اقتصادي ستونزو اندېښنه څرګنده کړه.

 

د کوټې پرېس کلب مشر عرفان سعید احتجاج کوونکو ته وویل چې خبریالان به د خپلو قانوني حقونو، د بیان د ازادۍ او د روزګار د خوندیتوب لپاره خپلې هڅې روانې ساتي. نوموړي وویل چې خبریالان له خپلو غوښتنو نه په شا کېږي او د هغوی د ستونزو د هواري لپاره به احتجاجونو ته دوام ورکړي.

 

د احتجاج ګډونوالو له حکومته وغوښتل چې د پیکا قانون ختم کړي، له دندو لرې کړل شوي خبریالان بېرته وګوماري او په رسنیزو ادارو کې د خبریالانو او نورو کارکوونکو د روزګار او معاشونو خوندیتوب یقیني کړي.

 

د خبریالانو د اتحادیو مشرانو وویل چې ازادې رسنۍ د ولس د معلوماتو ترلاسه کولو او د بیان د ازادۍ لپاره مهمې دي او پر خبریالانو محدودیتونه د خلکو د خبرتیا حق اغېزمنوي. د هغوی په وینا، خبریالانو ته باید داسې چاپېریال برابر شي چې له وېرې او فشار پرته خپل مسلکي کار ترسره کړي او حقایق خلکو ته ورسوي.

 

د پاکستان د خبریالانو وفاقي اتحادیې او د بلوچستان د خبریالانو اتحادیې مشرانو اعلان وکړ چې د خبریالانو د حقونو، د رسنیو د ازادۍ او د اقتصادي خوندیتوب لپاره به خپلې ګډې هڅې نورې هم منظمې کړي. هغوی وویل چې د غوښتنو تر منل کېدو پورې به احتجاجونو ته دوام ورکړي.