د خېبر پښتونخوا د نوښار ضلعې په اکوړه خټک کې د جمعیت علمای اسلام (س) د پخواني مشر مولانا سمیع الحق د وژل کېدو اتم تلین ولمانځل شو. په دې غونډه کې د هغه کورنۍ او د مذهبي ګوندونو مشرانو له حکومته وغوښتل چې د مولانا سمیع الحق، د هغه د زوی مولانا حامد الحق او د دارالعلوم حقانیې د نورو وژل شویو استادانو قاتلان ونیسي.

دا غونډه د نومبر پر دویمه د دارالعلوم حقانیې په ایوان شریعت هال کې جوړه شوې وه، چې د مدرسې استادانو، دیني عالمانو او د جمعیت علمای اسلام (س) مشرانو پکې ګډون کړی و.

د دارالعلوم حقانیې مرستیال مشر مولانا راشد الحق سمیع غونډې ته وویل چې د هغه د پلار مولانا سمیع الحق له وژل کېدو اته کاله تېر شوي، خو کورنۍ یې لا هم د انصاف په تمه ده.

نوموړي پوښتنه وکړه چې د دومره اوږدې مودې له تېرېدو سره سره د هغه د پلار، ورور او د دارالعلوم حقانیې د استادانو په وژنو کې ککړ کسان ولې تر اوسه نه دي نیول شوي.

مولانا راشد الحق سمیع وویل چې پلار یې په دیني، علمي او سیاسي ډګرونو کې مهم رول لوبولی او د هغه له وژل کېدو وروسته رامنځته شوې تشه لا هم نه ده ډکه شوې.

د جمعیت علمای اسلام (س) مشر مولانا عبدالحق ثاني غونډې ته وویل چې پاکستان دا مهال له سیاسي، اقتصادي او امنیتي ستونزو سره مخ دی او د ده په وینا، په داسې حالاتو کې د مولانا سمیع الحق د مشرتابه کمی په شدت محسوسېږي.

نوموړي وویل چې مولانا سمیع الحق د هېواد د سختو حالاتو پر مهال د بېلابېلو سیاسي او مذهبي ګوندونو د مشرانو د یو ځای کولو هڅې کولې.

مولانا عبدالحق ثاني د دفاع پاکستان کونسل په جوړولو او فعالیتونو کې د مولانا سمیع الحق رول هم وستایه او ویې ویل چې د هغه د دیني او سیاسي فکر د دوام لپاره به خپلې هڅې جاري ساتي.

هغه له حکومته وغوښتل چې د مولانا سمیع الحق، مولانا حامد الحق او د دارالعلوم حقانیې د نورو وژل شویو کسانو د قضیو پلټنې بشپړې او کورنیو ته یې انصاف ورکړي.

په غونډه کې مولانا عبدالقیوم حقاني، مولانا عرفان الحق، مولانا اسامه سمیع، مولانا خزیمه سمیع، مولانا لقمان الحق، مولانا عبدالغفور، شیخ الحدیث تاج محمد حقاني او یو شمېر نورو دیني عالمانو هم ګډون او ویناوې وکړې.

مولانا سمیع الحق د ۲۰۱۸ کال د نومبر پر دویمه په راولپنډۍ کې په خپل کور کې په چړو ووهل شو او ووژل شو. نوموړی د دارالعلوم حقانیې مشر او د جمعیت علمای اسلام (س) له مهمو سیاسي او مذهبي څېرو څخه و.

د هغه زوی مولانا حامد الحق حقاني هم د ۲۰۲۵ کال د فبرورۍ پر ۲۸مه په اکوړه خټک کې د دارالعلوم حقانیې په جومات کې په ځانمرګي برید کې ووژل شو.

د دغو وژنو په اړه د کورنۍ له تازه غوښتنو سره سره، په غونډه کې د پلټنو د اوسني حالت په اړه د پولیسو یا حکومتي چارواکو کوم دریځ نه دی وړاندې شوی.