نوښار (شال نیوز) : د خېبر پښتونخوا د نوښار ضلعې په پبو سیمه کې پولیسو پر یوه ۱۲ کلن ماشوم د جنسي تېري په تور یو تن نیولی دی.

 

د پبو تاڼې اېس اېچ او ایاز خان شال نیوز ته ویلي چې پېښه د درب پولیس چوکې په حدودو کې شوې او د ماشوم د شکایت پر اساس یې د تورن کس خلاف مقدمه درج کړې ده.

 

د پولیسو په وینا، ماشوم په خپل شکایت کې ویلي چې تورن کس د وسلې په زور پرې جنسي تېری کړی او د پېښې ویډیو یې هم په موبایل ټیلیفون جوړه کړې ده.

 

د شکایت له مخې، تورن کس ماشوم ته ګواښ کړی و چې که یې د پېښې په اړه چا ته معلومات ورکړل، له سختو پایلو سره به مخ شي.

 

ایاز خان ویلي چې پولیسو د شکایت له ترلاسه کولو وروسته کارروایي کړې او تورن کس، باسط امین، یې هغه مهال نیولی چې پېښور ته د تښتېدو هڅه یې کوله.

 

د پولیسو په وینا، د تورن کس خلاف د پاکستان پینل کوډ د ۳۷۶مې مادې او د ماشومانو د تحفظ د قانون د اړوندو مادو لاندې مقدمه درج شوې ده. پولیس وايي، د مقدمې تحقیقات روان دي او د پېښې اړوند شواهد راټولوي.

 

تر اوسه دا نه ده څرګنده چې د ادعا شوې ویډیو په اړه پولیسو څه شواهد ترلاسه کړي او د ماشوم طبي معاینه بشپړه شوې ده که نه. د تورن کس یا د هغه د وکیل دریځ هم نه دی ترلاسه شوی. پر نیول شوي کس لګېدلي تورونه لا په عدالت کې نه دي ثابت شوي.