تهرپارکر (شال نیوز) : د پاکستان د سِند صوبې د تهرپارکر ضلعې په نګرپارکر سیمه کې د یوه روغتیايي مرکز مخې ته په ولاړ ایمبولینس کې د اور لګېدو له امله اته کسان مړه شوي او لږ تر لږه څلور نور ژوبل شوي دي.
پېښه د اکتوبر د ۲۸مې په شپه شاوخوا لس بجې او څلوېښت دقیقې د ډانو ډاندهل کلي په روغتیايي مرکز کې شوې ده.
د نګرپارکر اسسټنټ کمشنر ارم کریم ناریجو په وینا، ایمبولینس د پي پي اېچ آی (PPHI) روغتیايي ادارې و او هغه مهال پکې اور ولګېد چې روغتیايي کارکوونکو یوه ناروغه ښځه بل روغتون ته د لېږدولو لپاره ایمبولینس ته انتقالوله.
د روغتون د انتظامیې د معلوماتو له مخې، کارکوونکو ایمبولینس ته د اکسیجن سلنډر نصبولو چې ناڅاپه چاودنه وشوه او اور ولګېد.
په مړو شویو کسانو کې یوه امیندواره ښځه، د روغتون څلور کارکوونکي او د ناروغانو دوه ساتونکي یاد شوي دي. ځینو راپورونو د یوه نوي زېږېدلي ماشوم د مړینې یادونه هم کړې ده، خو د ټولو مړو شویو کسانو بشپړ نومونه او پېژندګلوي لا نه ده تایید شوې.
د ریسکیو ۱۱۲۲ د تهرپارکر مسؤل حبیب الله ویلي چې د پېښې له خبر ترلاسه کولو وروسته د ژغورنې ډلې او د اور وژنې کارکوونکي سیمې ته ورسېدل. ژوبل شوي کسان د مټهي او نګرپارکر روغتونونو ته رسول شوي دي. د ځینو ژوبلو روغتیايي حالت د اندېښنې وړ ښودل شوی دی.
په اور کې ایمبولینس په بشپړ ډول سوځېدلی دی. د سیمې انتظامیې ویلي چې د چاودنې د علت معلومولو لپاره تحقیقات روان دي. که څه هم لومړني معلومات د اکسیجن سلنډر چاودنې ته اشاره کوي، خو د پېښې وروستی تخنیکي علت لا نه دی معلوم شوی.
د مړو شویو کسانو د شمېر په اړه په لومړنیو راپورونو کې اختلاف و. ځینو سرچینو اووه کسان یاد کړي وو، خو د تهرپارکر د ډپټي کمشنر په حواله په وروستیو راپورونو کې د اتو کسانو د مړینې تایید شوی دی. د ژوبلو شمېر هم په بېلابېلو راپورونو کې له څلورو تر پنځو پورې ښودل شوی دی.
د پېښې په اړه لا دا نه ده څرګنده شوې چې د ایمبولینس د اکسیجن سلنډر د خوندیتوب معاینه کله شوې وه او ایا د سلنډر د نصبولو پر مهال اړین احتیاطي تدابیر نیول شوي وو.


شال نیوز