سټراسبورګ (شال نیوز) : اروپايي پارلمان د جرمونو نړیوال عدالت د ۲۰۲۶ کال د سخاروف انعام ګټونکی اعلان کړی دی. دغه انعام هر کال هغو کسانو او ادارو ته ورکول کېږي چې د بشري حقونو، د بیان د ازادۍ او جمهوریت د ملاتړ لپاره کار کوي.

 

د اروپايي پارلمان مشرې روبرټا مېټسولا د انعام د اعلان پر مهال ویلي چې دا پرېکړه د جرمونو د نړیوال عدالت د خپلواک کار د ملاتړ څرګندونه کوي. د جرمونو نړیوال عدالت د اروپايي پارلمان د پرېکړې هرکلی کړی دی.

 

دغه اعلان په داسې وخت کي شوی چې د امریکا حکومت د نړیوال عدالت پر یو شمېر چارواکو بندیزونه لګولي دي. امریکا د اسرائیل د وزیراعظم بنیامین نتنیاهو خلاف د نړیوال عدالت د نیولو له حکم سره مخالفت کړی دی.

 

دغه حکم د غزې د جګړې پر مهال د جنګي جرمونو او د بشریت خلاف د جرمونو د تورونو په تړاو صادر شوی دی. اروپايي ټولنې د نړیوال عدالت د خپلواکۍ ملاتړ کړی او ویلي یې دي چې عدالت باید له سیاسي فشار پرته خپل کار ته دوام ورکړي.

 

د جرمونو نړیوال عدالت، چې مرکز یې د هالنډ په هاګ ښار کي دی، د نسل وژنې، جنګي جرمونو او د بشریت خلاف د جرمونو د تورونو پلټنې کوي.

 

د سخاروف انعام د پخواني شوروي ساینسپوه او د بشري حقونو د فعال اندري سخاروف په نوم دی. اروپايي پارلمان دا انعام له ۱۹۸۸ کال راهیسې ورکوي. ټاکل شوې چې د ۲۰۲۶ کال د سخاروف انعام د ورکولو مراسم د دسمبر په میاشت کي ترسره شي.

 

د اروپايي پارلمان او د جرمونو د نړیوال عدالت د اکتوبر د ۲۲مې رسمي بیانونو دا خبر تایید کړی دی. یوه مهمه خبره دا ده چې انعام یوازې عدالت ته نه، بلکې عدالت او د هغه چارواکو ته په ګډه ورکړل شوی دی. د انعام د ورکولو مراسم به د دسمبر په ۱۶مه په سټراسبورګ کي کېږي.