باجوړ (شال نیوز) : د باجوړ پولیسو په برنګ او ارنګ تاڼو کي د خلکو د ستونزو او شکایتونو اورېدو لپاره پرانیستې غونډې کړې دي. پولیس وايي، په برنګ کي د غونډې مشري ډي اېس پي سعیدالرحمان او په ارنګ کي د تاڼې مشر ظاهر شاه کوله.
په غونډو کي ځایي خلکو د امنیت، نشه يي توکو او نورو ستونزو په اړه خپل شکایتونه وړاندې کړل. د پولیسو په وینا، اړوندو افسرانو ته لارښوونه شوې چې د خلکو شکایتونه وڅېړي او د حل لپاره یې اقدامات وکړي.
ګډونوالو په باجوړ کي د نشه يي توکو پر ضد د پولیسو د عملیاتو ستاینه کړې او غوښتنه یې کړې چې دغه لړۍ نوره هم پراخه شي. پولیسو ویلي چې د نشه يي توکو د کاروبار او نورو جرمونو د مخنیوي لپاره به خپلو اقداماتو ته دوام ورکوي.
تر اوسه دا نه ده څرګنده چې په دواړو غونډو کي څومره شکایتونه ثبت شوي او څومره یې حل شوي دي.


حسبان الله باجوړې