سان فرانسسکو (شال نیوز) : په امریکا کي د پاکستان سفیر رضوان سعید شیخ له پاکستاني امریکایانو غوښتي چې د پاکستان او امریکا ترمنځ د تجارت او پانګونې په زیاتولو کي خپل کردار ادا کړي.
نوموړي د اکتوبر په ۱۶مه د سان فرانسسکو په خلیجي سیمه کي د پاکستاني ټولنې یوې غونډې ته ویلي چې په ټکنالوژۍ، کاروبار او نورو اقتصادي برخو کي د دواړو هېوادونو ترمنځ د همکارۍ پراخ امکانات شته.
د پاکستان د سفارت د معلوماتو له مخې، سفیر ویلي چې په امریکا کي مېشت پاکستانیان د خپلو مسلکي تجربو، کاروباري اړیکو او پانګونې له لارې د دواړو هېوادونو اقتصادي اړیکې پیاوړې کولی شي.
په غونډه کي د پاکستاني امریکایانو د بېلابېلو تنظیمونو استازو ګډون کړی و او د تجارت، پانګونې او اقتصادي همکارۍ پر امکاناتو خبرې وشوې.
تر اوسه د دې غونډې په نتیجه کي د کومې نوې تجارتي موافقې یا پانګونې اعلان نه دی شوی. دغه راز، سفارت نه دي ویلي چې په غونډه کي د پښتنو یا افغانانو د کاروباري ټولنې استازو هم ګډون کړی و.


شال نیوز