کوهاټ (شال نیوز) : د پاکستان د خیبر پښتونخوا د کوهاټ ډویژن نوي ټاکل شوي کمېشنر پروېز خان صبّت خېل ویلي، هڅه به وشي چې د وزیراعظم د ځوانانو پروګرام له لارې د سیمې خلکو، په ځانګړې توګه ځوانانو ته د زدهکړو او مسلکي مهارتونو په برخو کې ګټه ورسېږي.
د وزیراعظم د ځوانانو پروګرام د کوهاټ ولسوالۍ همغږي کوونکي ارشد خان او د کوهاټ ډویژن د ځوانانو د رسنیو ډلې غړي شوریم اقبال له نوي کمېشنر سره په لیدنه کې د دغه پروګرام د فعالیتونو په اړه خبرې کړې دي.
د ورکړل شویو معلوماتو له مخې، په دې لیدنه کې د کوهاټ پوهنتون دننه د ځوانانو د پرمختیا مرکز د فعالیتونو په اړه کمېشنر ته معلومات ورکړل شول.
په دې لیدنه کې د زدهکوونکو لپاره د بورسونو او د ډیجیټل ځوانانو مرکز په اړه هم خبرې وشوې. د یاد مرکز موخه ځوانانو ته د ډیجیټل ټکنالوژۍ او نویو مهارتونو د زدهکړې زمینه برابرول بلل شوې ده.
د معلوماتو له مخې، کمېشنر پروېز خان صبّت خېل د ځوانانو د پرمختګ لپاره دا ډول پروګرامونه ستایلي او ډاډ یې ورکړی چې د دغو پروژو له لارې به د کوهاټ اوسېدونکو او په ځانګړې توګه ځوانانو ته د ګټې رسولو هڅې وشي.
خو تر اوسه په ورکړل شویو معلوماتو کې د دغو پروګرامونو د عملي کېدو د راتلونکو پړاوونو، د بورسونو د شمېر او یا هم د ځوانانو لپاره د نویو اسانتیاوو د برابرېدو په اړه نور جزئیات نه دي ورکړل شوي.


علي افضل افضال