شال نیوز
کابل / اسلام اباد (شال نیوز) : پاکستان ویلي، په افغانستان کې یې په تازه هوايي بریدونو کې ۲۲ کسان وژلي چې اسلاماباد یې «وسله وال» بولي؛ خو د طالبانو حکومت وايي، د کونړ او هلمند په بریدونو کې د ښځو او ماشومانو په ګډون نهه ملکي کسان وژل شوي او ۱۱ نور ټپیان دي.
رویټرز د پاکستان د حکومت د یو ویاند له قوله ویلي، په هوايي بریدونو کې ۲۲ «وسله وال» وژل شوي او وسلې او مهمات هم له منځه وړل شوي دي. پاکستان تر اوسه د وژل شویو کسانو هویت او دا چې له کومو وسله والو ډلو سره یې تړاو درلود، په عامه توګه نه دی روښانه کړی.
د طالبانو د حکومت ویاند ذبیح الله مجاهد ویلي، پاکستاني الوتکو د کونړ ولایت د شلتن ولسوالۍ د چوګام درې او د هلمند ولایت د ګرمسیر ولسوالۍ د صفار سیمې استوګنیز کورونه بمبار کړي دي.
مجاهد وايي، په دواړو بریدونو کې د ښځو او ماشومانو په ګډون نهه کسان وژل شوي، ۱۱ نور ټپیان دي او درې کورونه ویجاړ شوي دي. هغه دغه بریدونه «تېری» او «جنایت» بللي او غندلي یې دي. دا د طالبانو د حکومت دریځ دی.
له هلمنده سیمه ییزو چارواکو د مرګ ژوبلې په اړه جلا معلومات هم ورکړي دي. د هلمند د اطلاعاتو او کلتور رئیس مولوي شیر محمد وحدت ویلي، په ګرمسیر کې دوه استوګنیز کورونه په نښه شوي دي.
د هلمند د اطلاعاتو او کلتور ریاست په وروسته معلوماتو کې ویلي چې په برید کې څلور کسان وژل شوي، اته ټپیان دي او درې نور لا درکه دي. سیمه ییز چارواکي وايي، په وژل شویو کې یوه سپین سرې ښځه او درې ماشومان شامل دي.
تر دې وړاندې ځینو سیمه ییزو سرچینو د هلمند او کونړ د مرګ ژوبلې تر دې لوړې شمېرې ورکړې وې. د دغو بېلابېلو شمېرو خپلواک تایید لا نه دی شوی.
پاکستان له څه مودې راهیسې د طالبانو پر حکومت تور لګوي چې تحریک طالبان پاکستان او نورې وسله والې ډلې د افغانستان خاوره د پاکستان پر ضد کاروي. د طالبانو حکومت دا تور ردوي او وايي، په پاکستان کې امنیتي ستونزې د هغه هېواد داخلي مسئله ده.
?
پاکستان وايي، په افغانستان کې د وروستیو هوايي بریدونو هدف د وسله والو پټنځایونه او اړوند تاسیسات دي. اسلام اباد وايي، د افغانستان خاوره باید د پاکستان پر ضد د بریدونو لپاره ونه کارول شي او پاکستان د خپلې خاورې او خلکو د دفاع حق لري.
د طالبانو حکومت بیا وايي، په دغو بریدونو کې ملکي کورونه په نښه شوي دي. رویټرز وايي، په خپلواکه توګه یې د پاکستان له خوا د ۲۲ «وسله والو» د وژل کېدو خبره او د طالبانو له خوا ورکړل شوې د ملکي مرګ ژوبلې شمېرې نه دي تایید کړې.
د پاکستان او افغانستان ترمنځ دغه تازه بریدونه د دواړو هېوادونو د اړیکو د ترینګلتیا پر مهال شوي دي. په وروستیو ورځو کې پاکستان څو ځله د افغانستان دننه د هوايي بریدونو خبر ورکړی؛ طالبان دا د افغانستان د حاکمیت سرغړونه بولي، خو اسلام اباد وايي هدف یې هغه وسله وال دي چې په پاکستان کې بریدونه کوي.
.jpeg)
