مستونګ (شال نیوز) : د پاکستان د بلوچستان صوبې په مستونګ ضلع کي ځايي سرچینې وايي، د کډکوچې د ریکي بوز په سیمه کي د کوټې ـ کراچۍ پر لویه لار مدینه هوټل د چاودېدونکو موادو په وسیله ویجاړ شوی دی.

سرچینو شال نیوز ته ویلي، چاودنه د دوشنبې او سه‌شنبې، د سپټمبر ۲۸مې او ۲۹مې ترمنځ شپه شوې او هوټل ته یې سخت زیان رسولی دی.

د ځايي سرچینو په وینا، د چاودنې له امله هوټل ته څېرمه یو پرچون دوکان هم ویجاړ شوی او د نږدې ټیوب‌وېلونو شاوخوا ۲۵۰ سولري تختې زیانمنې شوې دي. سرچینې وايي، د چاودنې زور د شاوخوا کورونو د کړکیو ښیښې هم ماتې کړې دي.

تر دې دمه په پېښه کي د مرګ ژوبلې راپور نه دی ورکړل شوی.

د پاکستان د ملي لویو لارو او موټروې پولیسو په یوه تازه سفري خبرتیا کي ویلي چې په کډکوچه کي نامعلومو وسله والو پر کوټې ـ کراچۍ لویه لار یو پل په چاودنه الوزولی او ټرافیک له بلې لارې اړول شوی دی.

په همدې سیمه کي امنیتي پېښې هم شوې دي. پولیسو ویلي وو چې د سپټمبر پر ۲۷مه په کډکوچه کي د کنډ عمراني د هلکانو دولتي های سکول په چاودېدونکو موادو په نښه شوی او د ودانۍ ګڼې خونې ویجاړې شوې وې.

تر دې تازه چک پورې د بلوچستان پولیسو یا ضلعي انتظامیې د مدینه هوټل د چاودنې په اړه تفصیلي رسمي بیان نه دی خپور کړی. د هوټل، دوکان او شاوخوا ۲۵۰ سولري تختو د زیان جزئیات هم په خپلواکه توګه نه دي تایید شوي.

د مدینه هوټل د چاودنې مسوولیت تر اوسه کومې ډلې په غاړه نه دی اخیستی.