واشنګټن (شال نیوز) : په امریکا کي د کډوالۍ د چارو د ادارې د نیونو په اړه داسې راپور خپور شوی چې ګنې افسرانو ته ویل شوي، هغه بې اسناده کډوال دې نه نیسي چې جرمي سابقه نه لري. خو د امریکا د کورني امنیت وزارت وايي، دا راپور سم نه دی.

ډېلي وایر د شنبې، د سپټمبر ۲۶مې په ورځ د کډوالۍ ادارې د سرچینو له قوله ویلي چې افسرانو ته په ټول هېواد کي لارښوونه شوې چې د اوس لپاره خپلې نیونې پر هغو کسانو متمرکزې کړي چې په جرمونو محکوم شوي یا پرې جرمي تورونه لګېدلي دي.

د راپور له مخې، په دې لارښوونه کي هغه کسان هم شامل دي چې د امریکا د پرېښودو وروستی حکم ورته شوی، خو جرمي سابقه نه لري. ویل شوي چې د اوس لپاره به دغه کسان هم نه نیول کېږي.

خو د امریکا د کورني امنیت وزارت د شنبې، د سپټمبر ۲۶مې په شپه دا خبره رد کړې ده. وزارت ویلي چې د نیونو په اړه داسې بندیز نه دی لګول شوی او د کډوالۍ قوانین به عملي کېږي.

تر اوسه د کډوالۍ ادارې په رسمي ډول داسې نوې پالیسي نه ده اعلان کړې چې له مخې یې د جرمي سابقې نه لرونکي بې اسناده کډوال له نیولو معاف شوي وي.

د دواړو څرګندونو له امله لا روښانه نه ده چې ایا افسرانو ته په داخلي توګه د نیونو د لومړیتوبونو د بدلولو کومه لنډمهاله لارښوونه شوې او که نه.

د کډوالۍ ادارې د اګست په میاشت کي نږدې ۵۱ زره کسان نیولي وو. د امریکا د کورني امنیت وزارت هغه مهال ویلي وو چې دا د ادارې د یوې میاشتې تر ټولو لوړ شمېر و.