نیویارک (شال نیوز) : د امریکا د خزانې وزیر سکاټ بېسنټ ویلي دي، چې د سپتمبر له ۲۳مې به ایراني هوايي شرکتونه په نړیواله کچه له سختو بندیزونو سره مخ شي او بهرني شرکتونه به نه شي کولی چې د ایران الوتکو ته تېل، د ناستې خدمتونه او ټکټونه برابر کړي.

بېسنټ د سپتمبر پر ۲۱مه له سي‌ اېن‌ بي‌ سي سره په مرکه کې وویل، که ایرانۍ الوتکې په بهرنیو هوايي ډګرونو کې کښېني، هغو شرکتونو ته چې تېل، د الوتکې د ناستې خدمتونه یا ټکټونه ورته برابروي، د امریکا د ډالري مالي نظام څخه د ایستلو ګواښ شته.

هغه وویل، د دې ثانوي بندیزونو له لارې به ایراني هوايي شرکتونه په نړیواله کچه له فعالیت سره له جدي ستونزو سره مخ شي.

د امریکا د خزانې وزارت د سپتمبر پر ۸مه د ایران د هوايي چلند پر برخه بندیزونه پراخ کړي او ویلي یې وو چې د ایران پاتې فعال هوايي شرکتونه یې هم د بندیزونو په نوملړ کې شامل کړي دي.

د خزانې وزارت وايي، هغه بهرني شرکتونه او کسان چې له بندیزونو سره مخ ایراني هوايي شرکتونو ته خدمتونه برابروي، د امریکا له مالي بندیزونو سره مخ کېدی شي.

بېسنټ دا هم ویلي دي چې امریکايي چارواکو له چینايي مالي چارواکو سره د ایران پر بندیزونو خبرې کړې دي او د هغه په وینا، چینايي چارواکو په دې اړه له امریکا سره خبرې روانې ساتلې دي.